Калі ў Беларусі паспрабуюць паўтарыць 2020 год, рэакцыя будзе вельмі жорсткая, не гледзячы ні на якія законы — Лукашэнка

13 сакавіка, Позірк. Калі хтосьці паспрабуе паўтарыць у Беларусі 2020 год, “рэакцыя будзе вельмі жорсткая”, заявіў Аляксандр Лукашэнка 13 сакавіка падчас паездкі ў Дрыбінскі раён Магілёўскай вобласці.

“Скажу больш: не гледзячы ні на якія законы і заканадаўства, я буду на гэта больш жорстка рэагаваць… Я павінен дзейнічаць так, як гэта трэба, і не толькі вам, а вам, дзецям”, — сказаў прамоўца (цытаты па відэафрагменце, апублікаваным у тэлеграм-канале, звязаным з яго прэс-службай).

Пры гэтым, паводле слоў Лукашэнкі, “закон для ўсіх адзіны”: “Парушыў закон — ідзі [у турму]”.

Гэтыя заявы былі зробленыя ў кантэксце візіту ў Мінск спецпасланніка прэзідэнта ЗША ў Беларусі Джона Коўла.

10 сакавіка літоўскі партал Delfi са спасылкай на ўласныя крыніцы паведаміў, што Коўл прыбудзе ў Вільнюс 18 сакавіка, пасля чаго адправіцца ў Мінск.

Як правіла, візіты прадстаўнікоў адміністрацыі амерыканскага прэзідэнта Дональда Трампа суправаджаюцца вызваленнем часткі палітвязняў. У абмен Вашынгтон здымае некаторыя санкцыі, як гэта ўжо адбылося з “Белавія“, “Беларуськаліем“ і блізкім да Лукашэнкі сербскім бізнэсоўцам Небойшай Карычам.

10 верасня 2020 года ў разгар пратэстаў супраць фальсіфікацыі вынікаў прэзідэнцкіх выбараў на карысць Лукашэнкі апошні сказаў фразу, якая стала знакамітай: “Часам не да законаў“. Яна прагучала падчас прадстаўлення новага генеральнага пракурора Андрэя Шведа, які стаў адным з найбольш актыўных правадыроў палітыкі падаўлення апанентаў рэжыму.

Гл. таксама:

Провалы Лукашенко. 5. Правовой Чернобыль. Закон стал дубиной в руках автократа (на рускай мове)