У Капыльскім раёне дзіця ўпала ў каналізацыйны люк і загінула

19 сакавіка, Позірк. Аб гібелі днём 18 сакавіка чатырохгадовага хлопчыка ў вёсцы Руднае Капыльскага раёна Мінскай вобласці паведаміў Следчы камітэт.

Адзначаецца, што “хлопчык знаходзіўся на прыдамавой тэрыторыі разам са сваімі братам і сястрой (2,5 і шэсць гадоў)”. Маці “ненадоўга адцягнулася, а пасля выявіла, што дзіця знікла”.

“У ходзе пошукаў высветлілася, што хлопчык упаў у размешчаны ў двары дома каналізацыйны рэзервуар. Нягледзячы на ​​аператыўныя дзеянні работнікаў МНС і медыкаў, выратаваць дзіця не ўдалося”, — паведаміў СК.

Адзначаецца, што “на месцы здарэння працуе следча-аператыўная група”: “Следчым з прыцягненнем спецыялістаў Дзяржаўнага камітэта судовых экспертыз праводзіцца агляд, фіксуецца следавая карціна, апытваюцца відавочцы”.

“Усе абставіны здарэння будуць устаноўлены Капыльскім раённым аддзелам Следчага камітэта ў ходзе праверкі. Асаблівую ўвагу следчыя нададуць прычынам і ўмовам, якія садзейнічалі гібелі дзіцяці”, — гаворыцца ў рэлізе.