БАЖ паведаміў пра ўзлом сайта “Радыё Рацыя”
19 сакавіка, Позірк. Аб узломе беларускай версіі сайта “Радыё Рацыя” паведаміла Беларуская асацыяцыя журналістаў (БАЖ).
Як адзначаецца, “кіберзлачынцы размясцілі фішынгавую старонку на сайце racyja.com — але толькі ў беларускамоўнай версіі”. Англійская і польская версіі партала — “чыстыя”.
Спецыялісты БАЖ у сферы кібербяспекі падкрэсліваюць, што атака працуе наступным чынам: “Пры загрузцы старонкі спецыяльны скрыпт спачатку выдаляе ўсе легітымныя банеры бяспекі, а затым накладвае на сайт поўнаэкранны iframe, які змяшчае падробленую праверку”.
4 сакавіка Мінскі гарадскі суд прыгаварыў 58-гадовага радыёвядучага і музыканта Алега Хаменку да 3 гадоў пазбаўлення волі ва ўмовах агульнага рэжыму паводле арт. 3614 КК (садзейнічанне экстрэмісцкай дзейнасці). Ён таксама аштрафаваны на суму, якая перавышае 20 тыс. рублёў.
Судовы працэс у дачыненні да Хаменкі пачаўся 19 лютага 2026 года. Вядома, што на экспертызу былі накіраваныя выпускі музычных праграм Хаменкі на “Радыё Рацыя”, раней прызнаным “экстрэмісцкім фарміраваннем”. Такім чынам, абвінавачанне звязанае з супрацоўніцтвам з радыёстанцыяй, адзначаў БАЖ.
Хаменка быў затрыманы ў Мінску 17 чэрвеня 2025 года пасля ператрусу ў яго кватэры.
Медыя “Радыё Рацыя” працуе ў Польшчы.
