22 сакавіка, Позірк. Новы 60-дзённы тэрмін, на працягу якога Польшча не прымае ад замежнікаў на мяжы з Беларуссю заявы аб прадастаўленні прытулку, пачаўся 22 сакавіка.
Абмежаванні падоўжаныя ў адпаведнасці з распараджэннем польскага ўрада, якое прэм’ер-міністр Дональд Туск падпісаў 18 сакавіка.
У пачатку 2025 года папярэдні прэзідэнт Польшчы Анджэй Дуда падпісаў закон, які дазваляе не прымаць заявы аб прадастаўленні міжнароднай абароны на асобных участках мяжы, якія вызначае ўрад. Парламент падтрымаў гэты дакумент у канцы лютага.
Права замежнікаў прасіць на мяжы з Беларуссю аб прадастаўленні прытулку было абмежавана распараджэннем урада ад 27 сакавіка 2025-га. Пасля рашэнне падаўжалася ў траўні, ліпені, верасні, лістападзе, студзені 2026-га.
Раней паведамлялася, што за 19 дзён сакавіка Польшча спыніла каля 60 спробаў мігрантаў незаконна пранікнуць з беларускай тэрыторыі (у 23 разы менш у гадавым вымярэнні; было звыш 1,3 тыс.), з пачатку 2026-га — больш за 120 (у 17,4 раза менш; больш за 2,1 тыс.).
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта “паклікалі”.
