У 2025 годзе з Грузіі выехала на 442 беларусы больш, чым заехала ў яе

Апублікавана на адкрытай версіі “Позірку” 28 сакавіка 2026 года ў 20:22

28 сакавіка, Позірк. У 2025 годзе з Грузіі выехала на 442 беларусы больш, чым заехала ў яе, сведчыць праведзены “Позіркам“ аналіз звестак Нацыянальнай паліцыі, у сферу адказнасці якой уваходзіць памежны кантроль.

Колькасць прыбылых склала 189.894, тых, хто з’ехаў, — 190.336.

Па гэтым паказчыку грамадзяне Беларусі занялі 9-е месца пасля грамадзян Расіі, Турцыі, Арменіі, Ізраіля, Азербайджана, Казахстана, Індыі і Украіны. Замыкаюць дзясятку кітайцы.

У 2024 годзе беларусаў у Грузію заехала на 53 больш, чым выехала з яе (180.284 супраць 180.231) — 7-е месца.

Годам раней, у 2023-м, беларусаў, якія выехалі з Грузіі, было больш на 1.989, чым тых, што заехалі туды (173.382 супраць 171.393), — 8-е месца.

Улады Грузіі, якой кіруе партыя прарасійскага алігарха Бідзіны (Барыса) Іванішвілі, не прынялі ніводнага станоўчага рашэння аб наданні грамадзянам Беларусі статусу ўцекача або гуманітарнага статусу.