У Рагачоўскім раёне праваліўся пад лёд і патануў падлетак

29 сакавіка, Позірк. Пра гібель у Рагачоўскім раёне (Гомельская вобласць) падлетка 2010 года паведамляе рэспубліканскае таварыства ратавання на водах (ТРВОД).

Паводле папярэдняй інфармацыі, 28 сакавіка непаўнагадовы “выйшаў з дому на шпацыр і дадому не вярнуўся”.

“Пасля звароту ў службу выратавання пачаліся пошукі зніклага”, — гаворыцца ў паведамленні.

Адзначаецца, што ў ноч на 29 сакавіка супрацоўнікі МНС на штучным вадаёме ў аграгарадку Балотня “выявілі палонку”.

“Пры абследаванні вадаёма пры дапамозе багра, на глыбіні каля трох метраў (на адлегласці 15–20 метраў ад берага) выяўлена і вынята цела хлопчыка”, — паведамляе ТРВОД.

Праводзіцца праверка, прызначаны шэраг экспертыз “для высвятлення прычын і абставінаў таго, што адбылося”.

У 2025 годзе ад вонкавых прычын загінула 110 дзяцей, паведаміла на прэс-канферэнцыі 17 лютага ў Мінску старшы пракурор Упраўлення па наглядзе за выкананнем заканадаўства аб непаўналетніх і моладзі Генеральнай пракуратуры Аксана Кірэйчык.

Для параўнання: у 2024 годзе ад знешніх прычын загінула 126 дзяцей. Такім чынам, за год паказчык знізіўся на 12,7%.