Ярашук заклікаў МАП да далейшай падтрымкі рэпрэсаваных у Беларусі прадстаўнікоў прафсаюзнага руху
29 сакавіка, Позірк. Былы старшыня Беларускага кангрэсу дэмакратычных прафсаюзаў (БКДП), экс-палітвязень Аляксандр Ярашук падзякаваў Міжнароднай арганізацыі працы (МАП) за падтрымку, аказаную яму падчас знаходжання за кратамі ў Беларусі. Пра гэта паведамляецца на фэйсбук-старонцы Бюро МАП па правах працоўных (ACTRAV).
Ярашук удзельнічае ў працы 356-й сесіі Адміністрацыйнага савета МАП, якая праходзіць у Жэневе (Швейцарыя) 23 сакавіка — 2 красавіка.
Адзначаецца, што ён заклікаў МАП “працягваць падтрымліваць усіх астатніх прафсаюзных лідараў і членаў, якія застаюцца пад вартай у краіне”.
У паведамленні гаворыцца, што на сесіі будуць разгледжаны “змены ў канкрэтных краінах, уключаючы наступныя меры па ажыццяўленні артыкула 33 у Беларусі”.
Пасля падзей 2020 года беларускія ўлады разграмілі незалежны прафсаюзны рух. У красавіку 2022 года па краіне пракацілася хваля ператрусаў і затрыманняў актывістаў. Праваабаронцы прызналі прадстаўнікоў незалежных прафсаюзаў, якія трапілі пад рэпрэсіі, палітвязнямі.
У ліпені 2022 года Вярхоўны суд ліквідаваў БКДП і чатыры яго членскія арганізацыі — Беларускі прафсаюз работнікаў радыёэлектроннай прамысловасці (РЭП), Беларускі незалежны прафсаюз (БНП), Свабодны прафсаюз металістаў (СПМ) і Свабодны прафсаюз Беларускі (СПБ). У краіне не засталося незалежных прафсаюзаў, існуе толькі праўладная Федерацыя прафсаюзаў Беларусі.
Міжнародныя прафсаюзныя арганізацыі асудзілі дзеянні беларускіх уладаў. Камітэт па выкананні нормаў Міжнароднай арганізацыі працы заклікаў неадкладна аднавіць права працоўных на свабоду асацыяцый. МАП пачаў працэдуру ўвядзення санкцый супраць Мінска, якія былі прынятыя ў чэрвені 2023 года. Сярод іншага ў дачыненні да Беларусі ўжыты 33 артыкул МАП, які прадугледжвае механізм увядзення санкцый у дачыненні да краіны — члена, які не выконвае рэкамендацыі арганізацыі, што тычацца выканання правоў працоўных.
Ярашук быў асуджаны 26 снежня 2022 года Мінскім гарадскім судом на 4 гады калоніі агульнага рэжыму, яго намеснік у БКДП Сяргей Антусевіч — на 2, бухгалтар Ірына Бут-Гусаім — на 1,5.
Усе трое прызнаныя вінаватымі паводле ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Акрамя таго, паводле ч. 3 арт. 361 (заклікі да мер абмежавальнага характару, іншых дзеянняў, накіраваных на прычыненне шкоды нацбяспецы Беларусі) асобна прызнаны вінаватым Ярашук, які неаднаразова публічна выступаў супраць санкцый.
Кіраўніцтва прафсаюзнай асацыяцыі затрымалі 19 красавіка 2022 года, пасля праваабаронцы прызналі іх палітвязнямі.
11 верасня 2025 года Ярашук быў вызвалены ў выніку перамоваў паміж Вашынгтонам і Мінскам і разам з іншымі 50 экс-зняволенымі гвалтоўна вывезены ў Літву.
