У лютым працэнтныя стаўкі па крэдытах выраслі да 11,22% — даныя Нацбанка

30 сакавіка, Позірк. Сярэднія стаўкі па крэдытах банкаў (тут і далей у нацыянальнай валюце, без уліку міжбанкаўскіх крэдытаў) за месяц выраслі на 0,06 працэнтнага пункта (з 11,16% у студзені да 11,22% у лютым 2026-га), сведчыць праведзены “Позіркам” аналіз даных Нацыянальнага банка.

Сярэдняя стаўка ў студзені 2025 года складала 10,36%, у лютым — 10,66%, сакавіку — 10,75%, красавіку — 10,79%, траўні — 10,88%, чэрвені — 10,96%, ліпені і жніўні — 11,15%, верасні — 11,13%, кастрычніку — 11,17%, лістападзе — 11,18%, снежні — 10,97%.

Такім чынам, у гадавым вымярэнні гэты індыкатар павялічыўся на 0,56 п.п.

Для юрыдычных асоб стаўка стала ніжэй на 0,04 п.п. (з 9,74% да 9,7%); для фізічных асоб — вышэй на 0,12 п. п. (з 12,17% да 12,29%).

Сярэднія працэнтныя стаўкі па новых крэдытах банкаў знізіліся на 0,31 п.п. (з 11,21% да 10,9%): для юрыдычных асоб — на 0,41 п.п. (з 11,27% да 10,86%), для фізічных асоб — выраслі на 0,68 п.п. (з 10,55% да 11,23%).

Стаўкі аднадзённага міжбанкаўскага рынку знізіліся на 0,2 п.п. (з 4,33% да 4,13%), стаўкі па абавязацельствах банкаў выраслі на 0,03 п.п. (з 6,46% да 6,49%).

Па ўсіх тэрміновых банкаўскіх укладах сярэднія працэнтныя стаўкі павялічыліся на 0,1 п.п. (з 11,04% да 11,14%), па новых банкаўскіх укладах зменшыліся на 0,04 п.п. (з 6,64% да 6,6%).

Рэгулятар будзе прымаць меры макрапрудэнцыяльнага характару “для стымулявання інвестыцыйнага крэдытавання і — пры неабходнасці — астуджэння залішняга спажывецкага попыту, арыентаванага на імпарт”, заявіў старшыня праўлення НБ Раман Галоўчанка 21 сакавіка 2025 года на сустрэчы з прадстаўнікамі банкаўскага сектара.

Нацыянальны банк з 1 студзеня 2026 года памяняў пералік фінансавых інструментаў, па якіх устанаўліваюцца значэнні разліковых велічынь стандартнай рызыкі (РВСР).

З 1 красавіка яны зніжаны:

па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання ад аднаго да трох гадоў — 14,14% гадавых (было 14,34%; -0,2 працэнтнага пункта);

па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання больш за тры гады — 15,31% гадавых (15,62%; -0,31 п.п.);

для новых крэдытаў, прадастаўленых фізічным асобам (за выключэннем ільготных), — 18,26% (18,49%; -0,23 п.п.);

для новых крэдытаў, прадастаўленых юрыдычным асобам (за выключэннем ільготных, інвестыцыйных), — 12,8% (12,91%; -0,11 п.п.);

для новых інвестыцыйных крэдытаў, прадастаўленых юрыдычным асобам (за выключэннем ільготных) стаўка засталася без змен — 11,8%.

“Мы распачалі і паставілі задачу перад банкаўскай сістэмай па далейшым павышэнні ашчаднай актыўнасці насельніцтва, — заявіў дзяржСМІ кіраўнік Нацыянальнага банка Раман Галоўчанка. — Па прадаўжэнні тэрмінаў размяшчэння ўкладаў атрымалі добры водгук — другі месяц мы фіксуем рост дэпазітаў і не толькі на тэрмін ад года да трох, але і звыш трох гадоў ужо фактычна”.

Паводле яго слоў, усе банкі сфарміравалі “прывабныя дэпазітныя прадукты на тэрмін звыш трох гадоў”.