У Пінскім раёне жанчыну пазбавілі бацькоўскіх правоў на семярых дзяцей
13 красавіка, Позірк. Суд Пінскага раёна (Брэсцкая вобласць) пазбавіў мясцовую жыхарку бацькоўскіх правоў на семярых дзяцей, паведамляе Генеральная пракуратура.
Паводле даных нагляднага ведамства, са студзеня 2024 года ў дачыненні да непаўналетніх “шматкроць праводзілася сацыяльнае расследаванне”, у красавіку дзеці былі прызнаныя маючымі патрэбу ў дзяржаўнай абароне. Іх забралі ў маці.
У сям’і, як заяўляецца, “выяўлены крытэрыі і паказчыкі сацыяльна небяспечнага становішча дзяцей“. Як паказалі праверкі, маці фактычна самаўхілілася ад выхавання і ўтрымання сваіх дзяцей: дома не было ежы, умовы пражывання былі антысанітарнымі, жанчына злоўжывала алкаголем з сужыцелем. Пару “неаднаразова знаходзілі ў стане алкагольнага ап’янення, а дзяцей пакінутымі без нагляду“.
У маці назапасілася запазычанасць па кампенсацыі выдаткаў, затрачаных дзяржавай на ўтрыманне дзяцей, у памеры больш за 8 тыс. рублёў. “Асацыяльны лад жыцця” прывёў таксама да запазычанасці па аплаце жыллёва-камунальных паслуг.
У 2025 годзе бацькоўскіх правоў пазбаўлена 3.065 чалавек (у 2024-м — 3.155), вынікае са звестак Вярхоўнага суда.
Сярод іх 1.220 жанчын (39,8%) і 1.845 мужчын (60,2%). Для параўнання: у 2024 годзе бацькоўскія правы страцілі 1.267 жанчын (40,2%) і 1.888 мужчын (59,8%).
У 2025 годзе суды разгледзелі 2.751 справу аб пазбаўленні бацькоўскіх правоў (у 2024-м — 2.828). Задаволена 2.507 пазоваў (2.558).
Паводле даных судовай статыстыкі, у мінулым годзе разгледжаны справы аб пазбаўленні адпаведных правоў у дачыненні да 664 маці (з іх 165 адзінокіх) і 1.261 бацькі. Рашэнне пазбавіць гэтых правоў у абодвух бацькоў суды вынеслі ў 556 выпадках.
Гл. таксама:
У Мінску дваіх дзяцей забралі з сям’і з-за бацькоў, якія злоўжываюць алкаголем
