13 красавіка, Позірк. Чарговая планавая інспекцыя Міжнароднага агенцтва па атамнай энергетыцы (МАГАТЭ) пройдзе 15 красавіка ў Аб’яднаным інстытуце энергетычных і ядзерных даследаванняў “Сосны” Нацыянальнай акадэміі навук, паведамляе прэс-служба Дэпартамента па ядзернай і радыяцыйнай бяспецы (Дзяржатамнагляд) МНС.
Паводле інфармацыі беларускага рэгулятара, праверка праводзіцца ў адпаведнасці з пагадненнем аб прымяненні гарантый у сувязі з Дагаворам аб нераспаўсюдзе ядзернай зброі. У рамках інспекцыі будзе праведзеная фізічная інвентарызацыі ядзернага матэрыялу, праверанае вядзенне справаздачнай дакументацыі.
Дзяржатамнагляд адзначыў, што “МАГАТЭ імкнецца незалежна праверыць выкананне прававога абавязацельства дзяржавы, якое заключаецца ў тым, што ядзерныя ўстаноўкі не выкарыстоўваюцца не паводле прызначэння, а ядзерны матэрыял не пераведзены з мірнага выкарыстання на вытворчасць ядзернай зброі або іншых ядзерных выбухных прыстасаванняў”.
19 сакавіка праверкі МАГАТЭ праходзілі ў інстытуце “Сосны” і на Беларускай атамнай электрастанцыі, аналагічныя мерапрыемствы заяўляліся на люты.
4–21 траўня эксперты агенцтва ацэняць бяспеку эксплуатацыі Беларускай АЭС (місія OSART).
