Губернатар Бранскай вобласці паведаміў пра другога за дзень пацярпелага ад удару дрона беларуса

22 кастрычніка, Позірк. Яшчэ аб адным пацярпелым ад удару дрона беларусу паведаміў губернатар Бранскай вобласці (Расія) Ягор Кавальчук у сваім тэлеграм-канале.

“Каля вёскі Дзяменка Навазыбкаўскай гарадской акругі ў выніку выбуху беспілотніка паранены кіроўца грузавога аўтамабіля. Медыкі надалі пацярпеламу неабходную дапамогу, прызначанае амбулаторнае лячэнне”, — напісаў чыноўнік.

Кавальчук таксама заявіў, што беларус “пацярпеў ад нападаў УСУ”.

Раней у той жа дзень расійскае агенцтва ТАСС са спасылкай на беларускае Міністэрства замежных спраў паведаміла пра беларуса, якіраніцай 22 кастрычніка ў Жукоўскім раёне Бранскай вобласці Расіі пацярпеў у выніку траплення беспілотніка па фуры.

Пагрозы яго жыццю няма, ён шпіталізаваны.

8 кастрычніка ў Бранскай вобласці РФ у выніку атакі БПЛА на грузавы аўтамабіль з беларускай рэгістрацыяй была цяжка параненая беларуска, ёй спатрэбілася хірургічнае ўмяшанне з ампутацыяй канечнасцяў. 13 кастрычніка Генеральная пракуратура Беларусі паведаміла аб узбуджэнні справы па ч. 2 арт. 289 КК (акт тэрарызму).

На наступны дзень пасля здарэння Міністэрства замежных спраў Беларусі ўручыла ноту пратэсту часоваму паверанаму ў справах Украіны Івану Навіцкаму ў сувязі з “атакай украінскага беспілотнага лятальнага апарата на грузавы аўтамабіль з беларускай рэгістрацыяй у Бранскай вобласці РФ”. Ведамства абвінаваціла Кіеў у наўмысным удары БПЛА па беларускім грузавіку.

9 кастрычніка МЗС Украіны выказаў пратэст у сувязі з заявай беларускага знешнепалітычнага ведамства: “Лічым беспадстаўным ўскладанне адказнасці на Украіну без апублікавання пераканаўчых доказаў яе датычнасці. Звяртаем увагу на тое, што публічныя абвінавачванні Украіны з боку Мінска суправаджаюцца рыторыкай пра нібыта наўмыснае ўцягванне Беларусі ў канфлікт і пагрозамі “адэкватных мер у адказ“.

Кіеў адхіліў “падобныя абсурдныя абвінавачванні“ ад краіны, якая “з’яўляецца саўдзельніцай злачынства агрэсіі супраць Украіны і надае шырокае садзейнічанне Расіі ў злачыннай захопніцкай вайне”.

17 чэрвеня ў Бранскай вобласці трапіў пад удар аўтобус з выхаванцамі Рэчыцкай дзіцяча-юнацкай спартыўнай школы № 2 (Гомельская вобласць). У транспартным сродку, які рухаўся з Рэчыцы ў Геленджык, знаходзілася 44 пасажыры, з іх 28 дзяцей-спартсменаў 2014-2015 гадоў нараджэння.

Пацярпела восем чалавек, у тым ліку шасцёра дзяцей, загінула жонка трэнера Рэчыцкай ДЮСШ-2 Вікторыя Гарошка.

Аляксандр Лукашэнка заявіў, што ў аўтобус з беларускімі дзецьмі трапіў менавіта ўкраінскі дрон.

Крымінальныя справы пасля гэтага былі распачатыя спачатку ў РФ, затым у Беларусі — таксама паводле арт. 289 КК. Пазней урад замацаваў за арганізатарамі выезду групы дзяцей за межы краіны на міжнародныя мерапрыемствы і суправаджаючымі асобамі адказнасць за забеспячэнне бяспекі непаўналетніх.

У канцы верасня неафіцыйна паведамлялася, што два беларускія вялікагрузныя аўтамабілі трапілі пад удары беспілотнікаў недалёка ад пункта пропуску Чырвоны Камень, які знаходзіцца на беларуска-расійскай мяжы, на сумежным баку ў Гомельскай вобласці мае назву Селішча.

2 ліпеня паведамлялася пра ўдар беспілотніка ў пункце пропуску Чырвоны Камень на мяжы Гомельскай і Бранскай абласцей. Пацярпеў аўтобус, які рухаўся па маршруце Мінск-Анапа з 19 пасажырамі. Два кіроўцы і адзін пасажыр атрымалі лёгкія раненні.