Жыхар Гродна атрымаў 10 гадоў пазбаўлення волі за 51 закладку з альфа-PVP

22 кастрычніка, Позірк. Да 10 гадоў пазбаўлення волі ў калоніі ўзмоцненага рэжыму прыгавораны 24-гадовы жыхар Гродна за распаўсюд асабліва небяспечнага псіхатропнага рэчыва альфа-PVP у складзе арганізаванай групы, паведамляе пракуратура Гродзенскага раёна.

Паводле матэрыялаў справы, у верасні 2025 года малады чалавек з карыслівых меркаванняў добраахвотна далучыўся да злачыннай групы, якая рэгулярна прадавала наркотыкі і псіхатропы праз інтэрнэт-краму ў Гродзенскай, Брэсцкай і іншых абласцях. Продаж ажыццяўляўся бескантактавым спосабам.

Працуючы закладчыкам, мужчына атрымаў не менш за 94 г альфа-PVP, расфасаваў рэчыва на дробныя дозы і схаваў у тайніках для продажу.

Праваахоўнікі знайшлі і канфіскавалі 51 закладку. За сваю дзейнасць абвінавачаны атрымаў больш за 3,5 тыс. рублёў.

На судзе ён прызнаў віну. Паводле пракуратуры, мужчына актыўна дапамагаў следству і добраахвотна вярнуў атрыманы злачынным шляхам даход.

Суд Гродзенскага раёна прызнаў яго вінаватым паводле ч. 4 арт. 328 Крымінальнага кодэкса (незаконны абарот наркотыкаў і псіхатропаў у складзе арганізаванай групы).

Акрамя пазбаўлення волі абвінавачану прызначаны штраф у памеры 150 базавых велічынь (6.750 рублёў).

Прысуд не набыў моцы і можа быць абскарджаны або апратэставаны ў апеляцыйным парадку.

19 кастрычніка паведамлялася пра затрыманне 34-гадовага жыхара Гомельскай вобласці, які, паводле інфармацыі МУС, працаваў кур’ерам інтэрнэт-крамы па продажы наркотыкаў. З яго аўтамабіля было канфіскавана 3 кг гашышу.

У той жа дзень стала вядома пра прысуд 33-гадоваму жыхару Ваўкавыска, які ў ліпені 2026 года набыў у Расіі амаль 3 кг мефедрону і перавёз яго ў Беларусь для продажу. Суд прыгаварыў яго да 10 гадоў пазбаўлення волі і аштрафаваў на 400 базавых велічынь (18 тыс. рублёў).