Дырэктар фірмы ў Шклоўскім раёне атрымаў 3,5 года зняволення з адтэрміноўкай за ўхіленне ад выплаты 720 тыс. рублёў падаткаў

22 кастрычніка, Позірк. 3,5 года зняволення з адтэрміноўкай выканання пакарання на два гады за ўхіленне ад выплаты 720 тыс. рублёў падаткаў і падатковае махлярства прызначыў суд Ленінскага раёна Магілёва 49-гадоваму дырэктару фірмы па аптовым продажы піламатэрыялаў.

Як паведаміла пракуратура Магілёва, мужчына, які кіраваў фірмай ў Шклоўскім раёне (Магілеўская вобласць), абвінавачаны ва ўхіленні ад выплаты падаткаў у буйным памеры і падатковым махлярстве ў асабліва буйным памеры.

Паводле матэрыялаў справы, у 2022–2026 гадах кіраўнік прадаваў піламатэрыялы расійскім кампаніям праз падкантрольнае яму прадпрыемства, зарэгістраванае ў РФ. У дакументах на адгрузку кошт прадукцыі значна заніжаўся, праз што ў бухгалтарскім уліку беларускай фірмы недакладна адлюстроўвалася выручка.

Частку дагавароў аб набыцці піламатэрыялаў у беларускіх арганізацый і іх далейшым продажы фігурант афармляў ад імя расійскага прадпрыемства, хаваючы падатковую базу па падатку на прыбытак.

У выніку бюджэт недаатрымаў больш за 382 тыс. рублёў гэтага падатку, адзначаецца ў паведамленні. Акрамя таго, дырэктар арганізаваў падрыхтоўку падатковых дэкларацый з заведама ілжывымі звесткамі пра падатковую базу па аперацыях, якія абкладаюцца ПДВ.

Неабгрунтавана яму вярнулі больш за 342 тыс. рублёў падаткаў. Агульны ўрон перавысіў 720 тыс. рублёў.

У судзе абвінавачаны прызнаў віну, раскаяўся і цалкам кампенсаваў шкоду, паведамляе пракуратура. Акрамя пазбаўлення волі яму прызначаны штраф у памеры 600 базавых велічынь (27 тыс. рублёў) і на пяць гадоў забаронена займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў.

Прысуд не набыў моц, можа быць абскарджаны або апратэставаны ў апеляцыйным парадку.

У жніўні 2026 года Следчы камітэт паведаміў пра завяршэнне расследавання крымінальнай справы фактычных уладальнікаў і службовых асобаў будаўнічай арганізацыі, якія абвінавачваюцца ва ўхіленні ад выплаты падаткаў у асабліва буйным памеры і злоўжыванні ўладай.

У чэрвені 2026 года Генеральная пракуратура накіравала ў суд справу фактычнага кіраўніка камерцыйных арганізацый і 10 яго меркаваных саўдзельнікаў. Ім інкрымінуецца ўхіленне ад выплаты падаткаў і страхавых узносаў у Фонд сацыяльнай абароны насельніцтва. Паводле абвінавачання, агульны ўрон па 30 эпізодах перавысіў 11 млн рублёў.