“Вясна”: У кастрычніку КДБ выключыў са спісу “тэрарыстаў” трох чалавек, з траўня — 40

22 кастрычніка, Позірк. У кастрычніку Камітэт дзяржаўнай бяспекі Беларусі выключыў са спісу асоб, якія маюць дачыненне да “тэрарыстычнай дзейнасці“, паведамляе праваабарончы цэнтр “Вясна“.

Як адзначаецца, гаворка ідзе пра Іллю Смалюгу*, Мікалая Амельчанку* і Кацярыну Джыга*.

Паводле звестак праваабаронцаў, усяго з траўня з пераліку выключана 40 чалавек.

“Большасць вядомых выпадкаў звязана з былымі палітвязнямі, якіх асудзілі за каментары ў інтэрнэце, выказванні супраць уладаў або дзеянні падчас пратэстаў. Частку з іх вызвалілі па памілаванні яшчэ ў 2024 годзе, але са “спісу тэрарыстаў“ прыбралі толькі сёлета. Гэта паказвае, што вызваленне з калоніі не азначае аўтаматычнага спынення ўсіх абмежаванняў“, — гаворыцца ў каментары “Вясны“.

У верасні і кастрычніку 2026 года КДБ унёс у “пералік арганізацый і фізічных асоб, якія маюць дачыненне да тэрарыстычнай дзейнасці“, 16 чалавек, выключыў са спісу — 19.

Цяпер у “спісе тэрарыстаў” 1.476 чалавек, з якіх 725 — грамадзяне Беларусі.

У Беларусі антыэкстрэмісцкае заканадаўства выкарыстоўваецца ўладамі для палітычных рэпрэсій. МУС і КДБ адвольна, у пазасудовым парадку абвяшчаюць экстрэмісцкімі групы грамадзян, аб’яднаных грамадскімі або палітычнымі інтарэсамі, якія крытыкуюць дзеянні ўладаў і патрабуюць зменаў у дзяржаўнай палітыцы.

Сродкі масавай інфармацыі і медыяарганізацыі, якія не падтрымліваюць рэжым, абвяшчаюцца “экстрэмісцкімі фармаваннямі“. Гэта адкрывае шлях для адвольнага крымінальнага пераследу і турэмнага зняволення іх супрацоўнікаў, абмежавання права на свабоду асацыяцый і выказвання меркавання.

* Кацярына Джыг была затрыманая 27 ліпеня 2023 года, асуджаная на 4 гады пазбаўлення волі паводле абвінавачанняў у паклёпе на Аляксандра Лукашэнку і яго абразе, у закліках да дзеянняў, накіраваных на прычыненне шкоды нацыянальнай бяспецы (арт. 367, 368, 361 КК). Прызнавалася палітзняволенай. Вызваленая па памілаванні 16 верасня 2024 года.

* Мікалай Амельчанка быў затрыманы 6 сакавіка 2022 года. Абвінавачаны ў распальванні варожасці, паклёпе на Лукашэнку, незаконных дзеяннях у дачыненні да інфармацыі аб прыватным жыцці і персанальных даных, садзейнічанні экстрэмісцкай дзейнасці (арт. 130, 367, 203¹, 361⁴). Вызвалены па памілаванні 16 верасня 2024 года.

* Ілля Смалюга быў затрыманы ў 2022 годзе, асуджаны на 3 гады пазбаўлення волі па “справе Зельцара“ за “распальванне варожасці“ (арт. 130). Выйшаў на волю на пачатку 2025 года. Постфактум прызнаны палітвязнем.