За суткі на пажарах загінула 5 чалавек, ад раней атрыманых апёкаў памерла 87-гадовая пенсіянерка

17 красавіка, Позірк. Пяць чалавек загінула на пажарах у Беларусі за мінулыя суткі, вынікае са зводкі Міністэрства па надзвычайных сітуацыях (МНС).

16 красавіка здарыўся пажар у нежылым доме ў горадзе Клімавічы (Магілёўская вобласць), загінуў мужчына 1969 года нараджэння.

У той жа дзень пажар здарыўся ў кватэры жылога дома ў Гомелі, дзе былі выяўленыя загінулыя гаспадар і яго жонка 1961 і 1958 г.н. Гарэла таксама кватэра ў Барысаве (Мінскай вобласці), знойдзены труп мужчыны 1983 г.н.

17 красавіка ў 02:36 у МНС паступіла паведамленне аб пажары ў жылым доме ў вёсцы Замошша (Асіповіцкі раён Магілёўскай вобласці). На месцы знойдзеная загінулая жанчына 1952 г.н.

Таксама паведамляецца, што раніцай 16 красавіка стала вядома пра смерць пенсіянеркі 1939 г.н. у бальніцы ад апёкаў, атрыманых 4 красавіка ў выніку загарання адзення пры распальванні газавай пліты ў кватэры ў Рэчыцы (Гомельская вобласць).

Такім чынам колькасць загінулых ад пажару ў сутачнай зводцы склала шэсць.

За суткі таксама ліквідаваныя адзін лясны пажар на плошчы 0,01 га і 11 загаранняў травы і кустоў на агульнай плошчы 1,791 га.

Паводле звестак МНС, агулам з пачатку года ў Беларусі адбылося 2.662 пажары (годам раней — 2.236, +19%), у тым ліку 16 — за мінулыя суткі. Траўмавана 246 чалавек (155, +58,7%), 262 загінула (217, +20,7%).

5 сакавіка намеснік начальніка ўпраўлення арганізацыі нагляду і прафілактыкі галоўнага ўпраўлення нагляду і прафілактыкі МНС Дзяніс Жукоўскі заявіў, што рост колькасці пажараў і загінулых ад іх людзей звязаны з “анамальна нізкімі тэмпературамі, якія рэгістраваліся ў студзені і пачатку лютага“.