27 красавіка, Позірк. У першым квартале 2026 года Польшча не дапусціла ніводнай паспяховай спробы нелегальнага перасячэння мяжы з боку Беларусі, заявіў міністр унутраных спраў і адміністрацыі краіны Марцін Кервіньскі 27 красавіка на нарадзе з удзелам кіраўнікоў службаў, якія адказваюць за бяспеку межаў.
Як паведамляе rmf24.pl, на нарадзе Кервіньскі “звярнуў увагу на эфектыўнасць памежнай загароды — гаворка ідзе пра ўзмоцнены плот, а таксама пра электронныя сістэмы, устаноўленыя на мяжы“. Паводле сцвярджэння кіраўніка МУСіА, у красавіку “сітуацыя практычна не мяняецца з пункту гледжання эфектыўнасці“.
“У нас быў адзін выпадак паспяховага прарыву нашай бар’ернай сістэмы, але гэты чалавек быў устаноўлены і вернуты“, — удакладніў Кервіньскі.
Намеснік кіраўніка ведамства Чэслаў Мрочак заявіў на нарадзе, што МУСіА будзе працягваць дзеянне буфернай зоны на мяжы з Беларуссю. Апошняе падаўжэнне адбылося 5 сакавіка (на чарговыя тры месяцы).
Таксама, паводле яго слоў, ведамства мае намер прасіць Сейм аб працягу на чарговыя 60 дзён абмежавання права замежнікаў прасіць прытулку на мяжы з Беларуссю (бягучы перыяд пачаўся 22 сакавіка).
На 26 красавіка з пачатку гэтага года Польшча прадухіліла 172 спробы незаконнага перасячэння мяжы з тэрыторыі Беларусі, што ў 32,4 раза менш, чым за аналагічны леташні перыяд (5.568), сведчыць праведзены “Позіркам” аналіз даных памежнай службы краіны.
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што тых туды нібыта “паклікалі“, а сам ЕС “душыць“ Мінск санкцыямі.
