4 траўня, Позірк. Аб праведзенай на палях саміту Еўрапейскай палітычнай супольнасці (ЕПС), які праходзіць у Арменіі, кароткай размове Святланы Ціханоўскай з прэм’ер-міністрам Канады Маркам Карні паведаміла прэс-служба беларускага дэмлідара.
Падкрэсліваецца, што гэта першая сустрэча беларускага палітыка з Карні, які ўзначаліў канадскі ўрад у сакавіку 2025 года.
“Для мяне было вельмі важна сустрэцца з прэм’ер-міністрам Канады — адным з лідараў, які таксама вельмі актыўны ў “Вялікай сямёрцы“. Мы абмеркавалі працяг супрацоўніцтва пасля яго перамогі на выбарах, а таксама развіццё ўзаемадзеяння, пачатага яшчэ пры прэм’ер-міністры Джасціне Трудо. Асобную ўвагу надалі падтрымцы журналістаў, стратэгічнаму дыялогу паміж Канадай і дэмакратычнымі сіламі Беларусі, а таксама магчымасці візіту ў Атаву сёлета“, — заявіла Ціханоўская.
Ціханоўская правяла таксама кароткую сустрэчу з міністрам замежных спраў Канады Анітай Ананд і прапанавала гэтай краіне далучыцца да Міжнароднага гуманітарнага фонду падтрымкі рэпрэсаваных.
Раней адзначалася, што падчас саміту ЕПС у Ерэване дэмлідар ужо правяла “дзясяткі кароткіх гутарак“.
Прэс-служба Ціханоўскай апублікавала кадры, на якіх яе можна ўбачыць са старшынёй Еўрапейскага савета Антоніу Коштай і кіраўніком Еўракамісіі Урсулай фон дэр Ляен; прэзідэнтамі Румыніі і Францыі Нікушору Данам і Эманюэлем Макронам; прэм’ер-міністрам Албаніі Эдзі Рамам, яго польскім калегам Дональдам Тускам і чэшскім — Андрэем Бабішам; генеральным сакратаром НАТО Маркам Рутэ і генсекам Савета Еўропы Аленам Берсе.
Яна таксама сустрэлася з міністрам замежных спраў Украіны Андрэем Сібігам.
Ціханоўская наведвала Канаду ў лістападзе 2022 года, красавіку 2024-га і лістападзе 2024-га.
