Ціханоўская і Пашынян другі раз за паўгода правялі перамовы

4 траўня, Позірк. Пра сустрэчу Святланы Ціханоўскай з прэм’ер-міністрам Арменіі Ніколам Пашынянам 4 траўня на палях саміту Еўрапейскай палітычнай супольнасці (ЕПС) у Ерэване паведаміла прэс-служба дэмакратычнага лідара.

Таксама палітык сустрэлася з міністрам замежных спраў Арменіі Араратам Мірзаянам.

Перамовы з Пашынянам і кіраўніком армянскага МЗС Ціханоўская назвала “важным знакам таго, што стасункі паміж дэмакратычнай Беларуссю і Арменіяй выходзяць на новы ўзровень”.

Ціханоўская і Пашынян сустракаліся таксама 30 кастрычніка 2025 года на палях Форуму міру ў Парыжы.

Як паведамляў “Позірк“, напярэдадні візіту дэмлідара ў Арменіі на запыт Мінска быў затрыманы і затым вызвалены беларускі палітуцякач, які прыбыў з Грузіі.

Арменія пад кіраўніцтвам прэм’ер-міністра Нікола Пашыняна, які прыйшоў да ўлады ў 2018 годзе пасля пратэстаў супраць ранейшых кіраўнікоў краіны, узяла курс на збліжэнне з Еўрасаюзам.

Пры гэтым у апошнія гады стасункі паміж Мінскам і Ерэванам значна пагоршыліся. Прычынай таму стаў апошні карабахскі ваенны канфлікт з Азербайджанам (першая фаза — канец 2020-га, другая — канец 2023-га), у выніку якога непрызнаная Нагорна-Карабахская Рэспубліка, якую падтрымлівала Арменіяй, спыніла існаванне, а тэрыторыі перайшлі пад кантроль Баку.

Гл. таксама:

МЗС раскрытыкаваў заяву спікера парламента Арменіі, які параўнаў Беларусь з расійскай губерняй