Лукашэнка: Ідэі звышдзяржаўнасці мацнеюць і наносяць свету новыя раны, але ўжо побач з нашымі межамі

9 траўня, Позірк. Беларусы “б’юцца на ўсіх франтах за праўду пра тую вайну, статус пераможцаў, суверэннае права выбіраць свой шлях на сваёй зямлі”, заявіў Аляксандр Лукашэнка 9 траўня пасля цырымоніі ўскладання вянкоў да абеліска “Манумент Перамогі” ў цэнтры Мінска.

Паводле яго слоў, беларусы, “як ніхто, ведаюць, наколькі хутка лозунгі пра новы парадак ператвараюцца ў шыбеніцы, лагеры, папялішча і безыменныя равы”.

“І няхай у фашызму цяпер іншы твар — выглянцаваная, гэта сутнасці не мяняе. Мы бачым гэты твар. Ідэі звышдзяржаўнасці, уласнай перавагі мацнеюць і наносяць свету новыя раны. Але ўжо побач з нашымі межамі”, — адзначыў Лукашэнка, не ўдакладніўшы, каго ён лічыць носьбітам ідэй звышдзяржаўнасці.

Побач з Беларуссю толькі адзін канфлікт — ужо пяты год цягнецца поўнамаштабная вайна Расіі супраць Украіны, шмат у чым ідэалагічна звязаная з адмаўленнем украінскай дзяржаўнасці і ўкраінцаў як асобнага народа. Рэжым у Мінску падтрымлівае агрэсію Крамля.

“Мы ведаем, хто наш праціўнык і вораг, — працягнуў спікер. — Гэта не народы. У Еўропе жывуць сем’і, якія, як і беларусы, захоўваюць праўдзівыя ўспаміны пра развязаную гітлераўскімі фашыстамі вайну. Наш вораг — рэваншысты, прамыя ідэйныя нашчадкі эсэсаўцаў, бандэраўцаў і “лясных братоў”. Тыя, хто проста зараз прыбірае парэшткі савецкіх салдат з літоўскага Шаўляя і называе подзвіг савецкага народа народаміфам. Тыя, хто метадычна выкрэслівае перамогу Чырвонай Арміі з гісторыі Другой сусветнай вайны і не пускае нас да месцаў пахавання дзядоў і прадзедаў. Да помнікаў, якія яшчэ засталіся цэлыя”.

Лукашэнка заявіў, што кветкі і вянкі ўскладаюцца ў тым ліку ў памяць “пра тых, хто застаўся ляжаць там, на чужыне, аддаўшы сваё жыццё за жыццё народаў Еўропы”, і іх “трэба вярнуць дадому”.

Паводле яго слоў, Дзень перамогі — гэта дзень “братэрскага адзінства народаў”: “Свята, якое нагадвае, наколькі мы моцныя, калі мы разам”. “Нам, спадчыннікам пераможцаў, нельга забыцца, хто мы, калі хочам жыць у свеце і бяспецы, калі мы не хочам вайны”, — сказаў палітык.

Назваўшы 9 траўня таксама днём “гістарычнай справядлівасці”, Лукашэнка заклікаў “захаваць праўду пра тую вайну, распавядаць усё, нават тое, што цяжка часам прамаўляць”. “Мы павінны навучыць сваю моладзь бачыць твар фашызму пад маскай добрых намераў. Гэта тое, што мы абавязаныя зрабіць для іх мірнай будучыні і роднай зямлі”, — адзначыў ён.

Звяртаючыся да нешматлікіх ветэранаў, спікер паабяцаў “зрабіць усё, каб захаваць той мір, які” тыя заваявалі.

Ранкам 9 траўня Лукашэнка разам з Уладзімірам Пуціным і шэрагам кіраўнікоў краін Азіі назіраў за ваенным парадам на Краснай плошчы ў Маскве.

24 лютага 2022 года РФ распачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследавальнікаў, многія беларускія прадпрыемствы зараз актыўна займаюцца вытворчасцю на карысць расійскага вайскова-прамысловага комплексу.