Выбары ў КР пачнуцца 11 траўня ў 22:00

10 траўня, Позірк. Выбарчая камісія па выбарах у Каардынацыйную раду на пазапланавым пасяджэнні 10 траўня прыняла рашэнне аб пераносе пачатку галасавання за чацвёрты склад палітычнай структуры.

Старт выбарчага працэсу ссунуты з 00:00 гадзін 11 траўня на 22:00 таго ж дня па беларускім часе.

На працягу гэтага часу каманда ІТ-спецыяліста Паўла Лібера будзе працягваць дадатковую праверку кампаніі Sumsub, адказную за верыфікацыю выбаршчыкаў (праверку пашпартных даных, фота і інш.).

Пры гэтым, калі праверка выявіць няўлічаныя рызыкі для ўдзельнікаў галасавання, пачатак выбараў можа быць перанесены на яшчэ больш позні тэрмін.

Раней 10 траўня выданне “Наша Ніва” паведаміла, што кампанія Sumsub, адказная за верыфікацыю выбаршчыкаў (праверку пашпартных даных, фота і інш.), “уяўляе сабой даволі скандальную арганізацыю”.

Паводле даных “НН”, Sumsub заснаваная ў 2015 годзе “трыма братамі Северухінымі”, якія сцвярджаюць, што маюць грамадзянства Ізраіля. Пры гэтым офісы кампаніі раней знаходзіліся ў Расіі.

“Пасля пачатку вайны кампанія заявіла, што спыніла дзейнасць у Расіі і Беларусі”, — гаворыцца ў публікацыі.

Адзначаецца, што цяпер Sumsub “пазіцыянуе сябе як брытанскую”, аднак невядома, “хто ў рэальнасці кантралюе кампанію”.

“Акрамя таго, у пачатку 2026 года кампанія пасля публікацый на хакерскіх форумах вымушана была прызнаць, што амаль паўтара года — з 2024 года — у яе сістэме былі трэція асобы, што ў выніку прывяло да кампраметацыі даных карыстальнікаў, у прыватнасці, іх імёнаў”, — адзначае СМІ.

Выбары ў КР чацвёртага склікання прызначаныя на 11–17 траўня 2026 года, пройдуць у анлайн-рэжыме на платформе, створанай камандай Лібера (яе адрас трымаецца ў сакрэце па меркаваннях бяспекі). Плануецца запоўніць 80 месцаў. Зарэгістраваныя 174 кандыдаты, якія ўвайшлі ў дзевяць выбарчых спісаў.