Латушка: У Беларусі 28 тэатраў і 67 турмаў і СІЗА
Выстава фотаздымкаў палітвязняў каля Бюро Еўрапейскага парламента ў Варшаве
22 траўня, Позірк. Сённяшняя Беларусь — “гэта турма“, у якой “знаходзяцца сотні, тысячы палітычных зняволеных, а рэпрэсіі не спыняюцца”, заявіў намеснік кіраўніцы Аб’яднанага пераходнага кабінета Павел Латушка падчас акцыі, прысвечанай Дню салідарнасці з палітвязнямі ў Беларусі.
Мерапрыемства прайшло 21 траўня ў Варшаве каля будынка Бюро Еўрапейскага парламента ў Польшчы.
Паводле слоў палітыка, у краіне “28 тэатраў і 67 турмаў і следчых ізалятараў”. Аляксандр Лукашэнка, падкрэсліў ён, працягвае “адпраўляць людзей у турмы і на катаванні”.
“Важна быць салідарнымі, звяртаць увагу свету на тое, што ў Беларусі адбываюцца самыя маштабныя ў Еўропе ў XXI стагоддзі рэпрэсіі, і адначасова дапамагаць тым, хто выйшаў з турмаў і быў дэпартаваны за мяжу“, — сказаў Латушка.
Павел Латушка (справа) на акцыі каля Бюро Еўрапейскага парламента ў Варшаве 21 траўня 2026 года
У гадавіну смерці палітвязня Вітольда Ашурка (21 траўня 2021 года ў шклоўскай калоніі № 17) дэмакратычная грамадскасць з ініцыятывы праваабаронцаў праводзіць Міжнародны дзень салідарнасці з беларускімі палітвязнямі.
50-гадовы Ашурак, які памёр пры нявысветленых абставінах у шклоўскай калоніі № 17 (Магілёўская вобласць), павінен быў выйсці на волю 9 чэрвеня 2025 года.
На раніцу 22 траўня беларуская праваабарончая супольнасць прызнае палітвязнямі 841 чалавека.
