Следчы камітэт праводзіць праверку па факце масавага атручэння дашкольнікаў у Барысаве

3 чэрвеня, Позірк. На даручэнне Генеральнай пракуратуры Следчы камітэт праводзіць праверку па факце масавага атручэння дзяцей дашкольнага ўзросту ў Барысаве (Мінская вобласць), паведамляе нагляднае ведамства.

Па выніках праверкі “будзе дадзеная крымінальна-прававая ацэнка” таго, што адбылося.

“Міністэрствам аховы здароўя і адукацыі даручана правесці адпаведныя санітарна-супрацьэпідэмічныя мерапрыемствы”, — гаворыцца ў паведамленні.

У рэлізе Генпракуратуры адзначаецца, што 2 і 3 чэрвеня ў прыёмнае аддзяленне Барысаўскай цэнтральнай раённай бальніцы з прыкметамі харчовага атручэння дастаўлена 29 дзяцей, “выхаванцаў розных устаноў адукацыі горада”.

3 чэрвеня дзяржСМІ паведамілі, што 27 дзяцей дашкольнага ўзросту з млоснасцю і ванітамі дастаўлена напярэдадні вечарам у інфекцыйнае аддзяленне Барысаўскай ЦРБ, на наступны дзень па меддапамогу звярнуўся яшчэ адзін пацыент з падобнымі сімптомамі.

Паводле слоў галоўнага ўрача бальніцы Аляксандра Дразда, самаадчуванне дзяцей паляпшаецца, але яны працягнуць лячыцца ў стацыянары.

Галоўны дзяржаўны санітарны ўрач Мінскай вобласці Аляксандр Тарасенка паведаміў, што сітуацыя стабільная, а дзеці знаходзяцца ў здавальняючым стане.

Падкрэслівалася, што спецыялісты занальнага і абласнога цэнтраў з вечара 2 чэрвеня працуюць у Барысаве, каб “мінімізаваць рызыку распаўсюджвання вострых кішэчных інфекцый сярод насельніцтва”.

Дзе і чым атруціліся дзеці, не паведамляецца.