Дзяржпагранкамітэт паведаміў аб выяўленні першага сёлета цела мігранта

4 чэрвеня, Позірк. Аб выяўленні “цела замежніка арабскай знешнасці” ў Браслаўскім раёне Віцебскай вобласці паведаміў 4 чэрвеня Дзяржаўны памежны камітэт (ДПК).

Цела знайшлі памежнікі ўвечары 2 чэрвеня ў лесапаласе за 50 метраў ад беларуска-латвійскай мяжы.

Паводле інфармацыі ДПК, памежнікі “выявілі сляды валачэння ад еўрапейскага пагранплота ў бок месца знаходжання загінулага“. “Акрамя таго, — адзначыў камітэт, — спіраль Бруна (загарода з калючага дроту. — “Позірк“.), якая раней перакрывала брамку для жывёл, была дэмантаваная”.

ДПК паведаміў, што падчас агляду цела выяўлены “сляды збіцця і прымянення электрашокера“. Дакументы і тэлефон у замежніка не выяўленыя.

Паводле інфармацыі Следчага камітэта, для ўстанаўлення прычыны смерці прызначаная судова-медыцынская экспертыза.

ДПК адзначае, што апошні раз “труп уцекача“ быў знойдзены памежнікамі ў кастрычніку мінулага года таксама каля плота з Латвіяй, а ўсяго на мяжы Беларусі з краінамі ЕС выяўлена 79 загінулых мігрантаў.

Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты аказваюцца на мяжы з краінамі ЕС у зоне адказнасці пагранічнага ведамства.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.

За першыя тры дні лета 2026 года Латвія паведаміла пра 293 спробы парушэння сваёй мяжы мігрантамі з трэціх краін, якія спрабуюць трапіць у Еўрасаюз праз Беларусь. З 1 да 3 траўня такіх спробаў было ў 2,2 раза менш (131), з 1 да 3 чэрвеня мінулага года — на 12,6% менш (256), сведчыць праведзены “Позіркам” аналіз.