16 чэрвеня, Позірк. Завершаны традыцыйны вясенне-летні збор сродкаў для дзяцей палітвязняў, усяго сабрана 11.451 еўра, вынікае з інфармацыі на сайце фонду салідарнасці BySol.
Збор быў абвешчаны 5 траўня, ён прымеркаваны да Дня абароны дзяцей і пачатку летніх канікул.
Адзначалася, што памер дапамогі для кожнага дзіцяці складзе 100 еўра. Заяўленая сума збору раней складала 10 тыс. еўра, затым была павялічана да 12 тыс., у выніку склала 17.100.
Такім чынам, сабрана 67% неабходнай сумы.
Падтрымка ўжо аказана 100 дзецям з 166, гаворыцца на сайце фонду.
Раней паведамлялася, што падаць заяўку на атрыманне дапамогі могуць: сем’і палітвязняў з дзецьмі, у якіх адзін з бацькоў або абодва знаходзяцца ў зняволенні не менш за тры месяцы альбо прысуджаныя да абмежавання волі з накіраваннем у ПУАТ або без накіравання; былыя палітвязні з дзецьмі, якія вызваліліся пасля 1 студзеня 2024 года; бацькі, якія адбываюць пакаранне ў выглядзе абмежавання волі без накіравання ў ПУАТ і пры гэтым маюць інваліднасць, альбо якія з’яўляюцца пенсіянерамі, альбо выхоўваюць дзяцей да трох гадоў.
Заяўкі на атрыманне дапамогі прымаліся да 31 траўня ўключна.
BySol штогод аб’яўляе зборы для дзяцей палітвязняў перад летнімі канікуламі, пачаткам навучальнага года і напярэдадні навагодніх святаў.
Летась перад летнімі канікуламі фонду ўдалося сабраць сродкі для 252 дзяцей.
