17 чэрвеня, Позірк. Аб праведзенай 16 чэрвеня сустрэчы паверанай у справах Германіі ў Беларусі з былымі малалетнімі вязнямі гета і канцэнтрацыйных лагераў, а таксама людзьмі, якія перажылі вайну і Халакост, паведаміла амбасада ФРГ у Мінску.
Сустрэча прайшла ў офісе дыппрадстаўніцтва. Амбасада адзначыла, што “падчас Другой сусветнай вайны ад акупацыі Германіяй тэрыторыі сённяшняй Беларусі пацярпелі не толькі дарослыя, але і дзеці”.
Адзначаецца, што “госці падзяліліся ўспамінамі пра вайну і пагутарылі з супрацоўнікамі амбасады на сумесным абедзе”.
“Агульная памяць была і застаецца падмуркам для развіцця адносін паміж Германіяй і Беларуссю. Дзякуем сведкам ваенных падзей за ўдзел у мерапрыемстве і гутаркі”, — гаворыцца ў паведамленні.
Мерапрыемства прайшло на наступны дзень пасля выказванняў Аляксандра Лукашэнкі ў інтэрв’ю тэлеканалу Al Arabiya, у тым ліку на тэму Халакосту. Гэтыя выказванні выклікалі дыпламатычны скандал.
З іх рэзкім асуджэннем 16 і 17 чэрвеня выступіла ізраільскае знешнепалітычнае ведамства, у тым ліку выклікаўшы ў МЗС амбасадара Беларусі Юрыя Ярашэвіча.
