Вальшчык лесу загінуў у Чачэрскім раёне

23 чэрвеня, Позірк. Аб гібелі 22 чэрвеня ў Чачэрскім раёне (Гомельская вобласць) вальшчыка лесу паведамляе Следчы камітэт.

Па інфармацыі СК, 59-гадовы работнік Бабіцкага лясніцтва ДСЛГУ “Чачэрскі спецлясгас” працаваў на ўчастку: “Каля поўдня мужчына спілаваў дрэва, якое пры падзенні закранула сухастой, і вярхушка, якая адламалася, упала зверху на яго. Ад атрыманых траўм вальшчык памёр”.

На месцы здарэння працавала следча-аператыўная група: “Следчым з прыцягненнем спецыялістаў Дзяржкамітэта судовых экспертыз праводзіўся агляд, зафіксавана следавая карціна. Канфіскаваны бензапіла, каска, навушнікі, часопіс рэгістрацыі інструктажу па ахове працы”.

Раённым аддзелам СК праводзіцца праверка.

Міністэрства лясной гаспадаркі аб трагедыі не паведамляе.