Амбасада Беларусі ў Экватарыяльнай Гвінеі закрываецца з ліпеня

25 чэрвеня, Позірк. Амбасада Беларусі ў Экватарыяльнай Гвінеі будзе закрыта ўжо з 1 ліпеня, вынікае з пастановы ўрада ад 24 чэрвеня № 315, якая апублікавана на Нацыянальным прававым інтэрнет-партале.

Міністэрству замежных спраў даручана прыняць меры “з ажыццяўленнем фінансавання расходаў па закрыццю ў межах сродкаў, прадугледжаных на ўтрыманне гэтага дыпламатычнага прадстаўніцтва”.

Аб закрыцці амбасады стала вядома 24 чэрвеня.

Характэрна, што замежная ўстанова павінна была адкрыцца да 1 жніўня 2024 года ў адпаведнасці з пастановай урада ад 22 снежня 2023-га № 930. Пасля гэтага ў інфармацыйных матэрыялах МЗС з’яўляліся звесткі аб сустрэчах часовага паверанага ў справах Беларусі ў Экватарыяльнай Гвінеі Уладзіслава Жура. На сустрэчах сярод іншага абмяркоўвалася пытанне адкрыцця пасольства гэтай краіны ў Беларусі, аднак прагрэсу, як відаць, дасягнута не было. Не быў прызначаны і амбасадар Менска.

10 чэрвеня гэтага года Жур сустракаўся з віцэ-прэзідэнтам Экватарыяльнай Гвінеі Тэадора Нгемай Абіянгам Манге, аднак у прэс-рэлізе МЗС Беларусі не сказана, ці абмяркоўвалася пытанне дыпламатычнай прысутнасці дзвюх краін на тэрыторыі адна адной.

Аляксандр Лукашэнка, віншуючы 5 чэрвеня прэзідэнта Экватарыяльнай Гвінеі Тэадора Абіянга Нгему Мбасага з 84-годдзем, заявіў аб гатоўнасці Беларусі да “далейшай сумеснай работы па ажыццяўленні ўсіх намечаных ініцыятыў” і адзначыў, што разлічвае на “працяг эфектыўнага і дзейснага міждзяржаўнага партнёрства”.

Ён запэўніў імянінніка, што “надае вялікае значэнне актывізацыі гандлёва-эканамічнага супрацоўніцтва” Мінска і Сьюдад-дэ-ла-Пас: “Асабліва актуальнай застаецца задача па напаўненню дасягнутых дамоўленасцей канкрэтным практычным зместам, у першую чаргу праз рэалізацыю ўзаемавыгадных праектаў у сферах сельскай гаспадаркі, будаўніцтва, аховы здароўя”.

Абіянг Нгема Мбасага кіруе краінай з 1982 года.

Па выніках двухбаковых перамоваў 9 снежня 2023 года ў Малаба (сталіца Экватарыяльнай Гвінеі да 2 студзеня 2026 года) Лукашэнка і Абіянг Нгема Мбасага падпісалі дарожную карту па развіцці супрацоўніцтва паміж дзвюма краінамі.

Дакумент, разлічаны на 2024–2026 гады, ахоплівае “15 ключавых напрамкаў узаемадзеяння”, уключаючы “кааперацыйныя праекты, пастаўкі беларускай тэхнікі і арганізацыю яе абслугоўвання, сельскагаспадарчую сферу, ахову здароўя, фармацэўтыку і рэалізацыю медыцынскага абсталявання, лясную гаспадарку”.

Бакі падпісалі пагадненні аб абароне інвестыцый, прадухіленні двайнога падаткаабкладання і прадухіленні ўхіленняў ад выплаты падаткаў на прыбытак і маёмасць.