Нягледзячы на ​​ціск РФ, Беларусь разумее рызыкі баявых дзеянняў на яе мяжы — Дземчанка

1 ліпеня, Позірк. Дзяржаўная памежная служба Украіны (ДПСУ) не фіксуе пранікненняў у краіну дыверсійна-выведніцкіх груп з тэрыторыі Беларусі, заявіў 1 ліпеня журналістам спікер ведамства Андрэй Дземчанка.

“Нейкіх нестандартных сітуацый або спробаў заходу ДВГ з тэрыторыі Беларусі няма. Нягледзячы на ​​ціск Расіі, Беларусь для сябе выразна разумее далейшыя рызыкі, калі баявыя дзеянні перакінуцца на яе мяжу”, — цытуе прадстаўніка пагранслужбы інфармагенцтва “Укрінформ”.

Паводле слоў Дземчанкі, размешчаныя на беларускай тэрыторыі рэтранслятары, якія РФ выкарыстоўвае для таго, каб біць па Украіне “Шахедамі”, выключаныя. У той жа час, адзначыў ён, “у Беларусі працягваюць развіваць аб’екты вайсковай інфраструктуры, якія могуць быць дадзеныя ў карыстанне Расійскай Федэрацыі падчас разгортвання ваенных дзеянняў”.

19 чэрвеня прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення расійскіх дронаў уздоўж мяжы з Украінай: “Калі ён гэта не зробіць, зробім мы”. Палітык таксама заклікаў спыніць пастаўку нафтапрадуктаў расійскаму войску.

На наступны дзень у звароце да суайчыннікаў ён заявіў, што Украіне вядома “пра чатыры такія рэтранслятары ў Беларусі — у Гомельскай і Брэсцкай абласцях”, і паўтарыў, што Беларусь “мае час, каб дэмантаваць гэтае абсталяванне”.

24 чэрвеня Зяленскі паведаміў, што абсталяванне спыніла працу за два дні да таго: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі пільна сачу і штодзённыя даклады атрымліваю. Факт, што рэтранслятары на сёння не працуюць”.

Днём пазней кіраўнік украінскай дзяржавы запатрабаваў спыніць развіццё прыгранічнай інфраструктуры агрэсіі з боку Мінска.

Яраслаў Чарнагор, Амбасадар МЗС Украіны па асаблівых даручэннях, які адказвае за сувязі з беларускімі дэмсіламі, заяўляў, што раней Кіеў ужо знішчыў аналагічныя рэтранслятары на беларускай мяжы. Гэтая тэма не ўзнімалася ў публічнай прасторы, аднак пасля Крэмль зноў усталяваў у Беларусі такое абсталяванне.

Галоўнакамандуючы Узброенымі сіламі Украіны Аляксандр Сырскі 30 чэрвеня паведаміў, што беларускі бок не дэмантаваў рэтранслятары, якія дапамагаюць наводзіць расійскія дроны на ўкраінскую тэрыторыю, аднак яны былі выключаныя на некаторы час.

“Учора Беларусь уключыла адзін рэтранслятар, але, я думаю, больш яны іх уключаць не будуць. <…> [Беларускія ўлады] усвядомяць, што гэта не трэба рабіць, так бы мовіць”, — сказаў ён.

Паводле інфармацыі Сырскага, зараз “ніякага засяроджвання войскаў з боку Беларусі не назіраецца”.