25-дзённыя зборы тэрытарыяльных войскаў пачаліся ў двух раёнах Беларусі — на мяжы з Украінай, непадалёк ад Польшчы
7 ліпеня, Позірк. “Планавыя навучальныя зборы” з ваеннаабавязанымі тэрытарыяльных войскаў Маларыцкага і Драгічынскага раёнаў (Брэсцкая вобласць) праходзяць 7–31 ліпеня, паведамляе прэс-служба Міністэрства абароны.
У рамках збораў плануецца ажыццявіць “▫️прыём ваеннаабавязаных <…> і іх усебаковае забеспячэнне; аднаўленне навыкаў каманднага складу ў кіраванні падначаленымі; падрыхтоўку ваеннаабавязаных да выканання задач у адпаведнасці са службовым прызначэннем; адпрацоўку пытанняў фармавання, падрыхтоўкі і прымянення атрадаў народнага апалчэння”.
Заяўлена, што “асноўная ўвага” будзе нададзеная “адпрацоўцы задач тэрытарыяльнай абароны ў ходзе рэалізацыі захадаў ваеннага становішча з адпрацоўкай пытанняў абароны асабовага складу і аб’ектаў ад беспілотных лятучых апаратаў”.
Варта адзначыць, што абодва згаданыя раёны мяжуюць з Валынскай вобласцю Украіны. Акрамя таго, ад заходняй ускраіны Маларыцкага раёна да мяжы з Польшчай — каля 10 кіламетраў, Драгічынскага раёна — каля 75 км.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны (напад пачаўся ў тым ліку з беларускай тэрыторыі). На гэтым фоне ў краіне практычна безупынна праводзяцца вайсковыя вучэнні. Апошнім часам Аляксандр Лукашэнка ўсё часцей заяўляе, што Беларусь “рыхтуецца да вайны”.
У той жа час Кіеў у апошні час заняў больш жорсткую пазіцыю ў дачыненні да Мінска. Прэзідэнт Украіны Уладзімір Зяленскі публічна запатрабаваў ад беларускіх уладаў неадкладна спыніць любую падтрымку Расіі.
На фоне папярэджання пра наступствы за дапамогу Маскве, а таксама двух інцыдэнтаў, калі на тэрыторыі РФ пад удар трапілі два аўтобусы з беларускімі грамадзянамі, Лукашэнка сустрэўся з прэзідэнтам РФ Уладзімірам Пуціным і старшынёй КНР Сі Цзіньпінам. Апошні выступіў у абарону “дзяржаўнага суверэнітэту, незалежнасці і тэрытарыяльнай цэласнасці” Беларусі, а таксама выбару “шляху развіцця, які адпавядае яе ўласным нацыянальным умовам”.
6 ліпеня генеральны сакратар НАТО Марк Рутэ на прэс-канферэнцыі напярэдадні саміту арганізацыі заклікаў “не мець ілюзій адносна ролі, якую адыгрывае Беларусь”. “Я маю на ўвазе, што яна знаходзіцца пад вялікім уплывам Расіі, Масквы. Таму, на мой погляд, тое, што адбываецца ў Мінску ў значнай ступені прадыктавана, калі можна так сказаць, Пуціным”, — сказаў ён.
Лукашэнка запэўніў беларускіх вайскоўцаў, што "Арэшнік" і расійская ТЯЗ — "не хлам"
6 ліпеня, Позірк. Размяшчэнне ў Беларусі расійскага ўзбраення — ракетнага комплексу "Арэшнік" і тактычнай ядзернай зброі — стала "сур'ёзным фактарам стратэгічнага стрымлівання, здольным астудзіць самыя гарачыя галовы", такое меркаванне выказаў Аляксандр Лукашэнка 6 ліпеня ў Мінску на цырымоніі ўшаноўвання выпускнікоў …
