Ціханоўская падтрымала ініцыятыву па ўсталяванні бел-чырвона-белага сцяга на Грунвальдскім полі
14 ліпеня, Позірк. Беларускі дэмакратычны лідар Святлана Ціханоўская падтрымала грамадскую ініцыятыву па ўсталяванні нацыянальнага бел-чырвона-белага сцяга на Грунвальдскім полі.
У тэлеграм-канале палітыка паведамляецца, што адпаведныя лісты яна накіравала маршалку Вармінска-Мазурскага ваяводства Польшчы і кіраўніцтву музея Грунвальдскай бітвы. Сцвярджаецца, што за ініцыятыву “ўжо сабрана больш за тысячу подпісаў беларускіх палітыкаў, культурных і грамадскіх дзеячаў, гісторыкаў і актывістаў”.
Ціханоўская ў лісце адзначыла, што “Грунвальдская бітва — гэта супольная спадчына палякаў, беларусаў, літоўцаў, украінцаў і іншых народаў, якія разам абаранялі свабоду”. Для беларусаў, напісала яна, “гэта адна з ключавых дат нацыянальнай гісторыі, а бел-чырвона-белы сцяг сімвалізуе гістарычную пераемнасць беларускай дзяржаўнасці і сучасную барацьбу за свабоду”.
“Кожны год сотні беларусаў прыязджаюць на Грунвальдскае поле, каб ушанаваць гэтую перамогу. На жаль, у самой Беларусі ўлады мэтанакіравана выціскаюць памяць пра Грунвальдскую бітву і замяняюць яе расійскімі гістарычнымі наратывамі. Таму так важна захаваць гэтае месца як сімвал нашай агульнай еўрапейскай гісторыі”, — падкрэсліла дэмлідар.
У офісе Светланы Ціханоўскай “разумеюць, што сёлета рэалізаваць такую ініцыятыву ўжо практычна немагчыма”. Аднак каманда палітыка спадзяецца, што “мясцовыя ўлады і арганізатары святкаванняў змогуць разгледзець гэтую прапанову пры падрыхтоўцы наступных угодкаў Грунвальдскай бітвы”.
Грунвальдская бітва паміж злучаным войскам Польскага каралеўства і Вялікага княства Літоўскага (ВКЛ) і войскам Дзяржавы Тэўтонскага ордэна адбылася 15 ліпеня 1410 года непадалёк ад вёскі Грунвальд, якая зараз знаходзіцца на тэрыторыі Польшчы. Саюзнае войска перамагло.
Палітычнае значэнне бітвы было вельмі важным у гісторыі Польскага каралеўства і ВКЛ — была спынена нямецкая экспансія на землі балтаў і ўсходніх славян, пакладзены пачатак палітычнаму заняпаду Тэўтонскага ордэна. Эканоміка ВКЛ атрымала выхад на балтыйскія гандлёвыя шляхі — глыбей у Еўропу.
