Польскі перавозчык злоўлены на заніжэнні кошту лекаў пры ўвозе ў Беларусь

14 ліпеня, Позірк. Польскі перавозчык паспрабаваў занізіць мытны кошт партыі лекавых сродкаў пры ўвозе на тэрыторыю Еўразійскага эканамічнага саюза праз Беларусь, паведаміла прэс-служба Дзяржаўнага мытнага камітэта са спасылкай на інфармацыю Гродзенскай рэгіянальнай мытні.

Паводле даных ведамства, груз транспартаваўся ў аўтамабілі DAF праз пункт пропуску Бераставіца (з польскага боку — Баброўнікі). Кіроўца прадставіў дакументы на тавар, аднак мытнікі высветлілі, што звесткі, якія ў іх утрымліваюцца, не адпавядаюць рэчаіснасці.

Як сцвярджае мытня, кошт партыі лекаў быў заніжаны на 53 тыс. еўра. Паводле ацэнкі ведамства, калі б схема засталася незаўважанай, гэта дало б магчымасць недаплаціць каля 45 тыс. рублёў мытных плацяжоў.

Гродзенская рэгіянальная мытня распачала адміністрацыйны працэс паводле ч. 3 арт. 15.5 КаАП (недэклараванне або прадстаўленне недакладных звестак пра тавары). У выпадку прыцягнення да адказнасці перавозчыку трэба будзе заплаціць плацяжы, а таксама штраф у памеры да 30% кошту незаконна ўвезеных тавараў.