У Расіі знішчаць амаль 40 тыс. армянскіх руж, якія спрабавалі ўвезці праз Беларусь
16 ліпеня, Позірк. У Смаленскай вобласці Расіі прынятае рашэнне знішчыць партыю з 39,2 тыс. свежазрэзаных руж, якая накіроўвалася з Беларусі. Груз не прапусцілі праз расійскую тэрыторыю праз дзейныя абмежаванні на падкаранцінную прадукцыю з Арменіі.
Як паведамляе ўпраўленне Федэральнай службы РФ па ветэрынарным і фітасанітарным наглядзе (Рассельгаснагляд) па Бранскай, Смаленскай і Калужскай абласцях, кветкі знайшлі ў грузавіку, які афіцыйна перавозіў безалкагольныя танізавальныя напоі. Ружы знаходзіліся ў грузавым адсеку — без фітасанітарных і таварасуправаджальных дакументаў.
Пры праверцы інспектары высветлілі, што на часткі скрыняў былі выдаленыя маркіравальныя этыкеткі, а на захаваных пазначалася краіна паходжання прадукцыі — Рэспубліка Арменія. Аўтамабілем кіраваў грамадзянін Беларусі, груз накіроўваўся з Мінскай вобласці ў Маскву.
Расійскі бок адмовіў у транзіце партыі і выдаў прадпісанне на знішчэнне кветак. Беларускага перавозчыка прыцягнулі да адміністрацыйнай адказнасці паводле арт. 10.2 КаАП РФ.
Рассельгаснагляд нагадаў, што з 12 чэрвеня 2026 года РФ увяла часовыя абмежаванні на ўвоз у краіну і транзіт праз яе тэрыторыю падкаранціннай прадукцыі, якая паходзіць з Арменіі або накіроўваецца з гэтай краіны. У Маскве рашэнне патлумачылі выяўленнем “парушэнняў фітасанітарных патрабаванняў”.
Варта адзначыць, што выпадак з ружамі стаў адным з першых публічна вядомых эпізодаў, калі новыя расійскія абмежаванні адносна армянскай прадукцыі закранулі груз, які праходзіў праз Беларусь.
