Затрыманы жыхар Латвіі, які перавозіў у салоне і багажным адсеку нелегалаў, што праніклі з Беларусі

18 жніўня, Позірк. Неграмадзянін Латвіі, які перавозіў мігрантаў, што праніклі з Беларусі, затрыманы 18 жніўня вайскоўцамі мясцовых Узброеных сіл у Краслаўскім краі, паведамляе памежная служба балтыйскай дзяржавы.

Пяць нелегалаў знаходзілася ў салоне і багажным адсеку аўтамабіля “Вольва“.

На перавозчыка заведзеная крымінальная справа. Адзначаецца, што такіх спраў з пачатку 2026 года ўзбуджана 125 у дачыненні да 101 асобы.

10 жніўня ў Латвіі пачалася аперацыя Vilkatis (“Ваўкалак”). Заяўленая мэта — скараціць паток мігрантаў, якія незаконна перасякаюць мяжу з боку Беларусі.

Згодна з праведзеным “Позіркам“ аналізам масіву аператыўных звестак памежнай службы Латвіі, спробы парушэння мяжы фіксуюцца штодня з 25 сакавіка. За мінулыя 146 дзён іх было 9.790, з пачатку года — 9.931.

На долю Латвіі ў 2026 годзе прыпадае 86,3% усіх спробаў мігрантаў трапіць у Еўрасаюз праз Беларусь. У 2025 годзе гэты паказчык складаў 28,1%, у 2024-м — 14,7%, у 2023-м — 32,9%.

У ноч на 11 жніўня латвійскія памежнікі ўпершыню выявілі тунэль, які вядзе з Беларусі.

* Неграмадзяне Латвіі — катэгорыя асобаў, якія пражываюць у краіне, але не маюць гістарычнага права на грамадзянства; у асноўным гэта тыя, хто прыбыў пасля 1940 года, калі Латвія была акупаваная СССР, і іх нашчадкі. Маюць усе сацыяльна-эканамічныя правы, але абмежаваныя ў палітычных (забарона на ўдзел у выбарах і інш.). У агульнай колькасці насельніцтва іх доля зніжаецца і ў 2026 годзе складае менш за 9%.