У Беларусі адкрыўся сезон трафейнага палявання

20 жніўня, Позірк. Аб адкрыцці 20 жніўня сезона трафейнага палявання на лася, высакароднага аленя і лань у перыяд гону паведаміла Беларускае таварыства паляўнічых і рыбаловаў (БТПР).

Да 30 верасня дазволена здабываць “дарослых самцоў, у тым ліку трафейнай якасці”, а таксама “селекцыйных жывёл любога полу і ўзросту”.

БТПР сцвярджае, што ў Беларусі паляванне — “важная частка традыцыйнай культуры”, а таму паляўнічыя з “нецярпеннем чакаюць адкрыцця сезонаў палявання, у тым ліку трафейнага палявання на капытных жывёл”.

Здабыча ажыццяўляецца на падставе дазволу і паляўнічай пуцёўкі да яго.

Для вышуку здабытых і здабычы параненых паляўнічых жывёл дазваляецца выкарыстоўваць паляўнічых сабак: лягавых, спаніэляў, рэтрывераў, тэр’ераў і такс, а таксама сабак іншых парод, якія маюць палявой дыплом па крывяным следзе.

БТПР устанавіў кошт дазволу і паляўнічай пуцёўкі да яго на здабычу. У прыватнасці, за лася з рагамі (у залежнасці ад колькасці атожылкаў) — ад 1.100 да 2.500 рублёў, высакароднага аленя — ад 900 да 2.500.

Арганізацыя паведаміла, што кошт паляўнічых пуцёвак для грамадзян Беларусі, якія не з’яўляюцца членамі БТПР, “павышаецца ў два разы”.

Таксама адзначаецца, што ў краіне працягваецца паляванне на мядзведзя (жывёлы любога полу і ўзросту), дзіка, цецерука, вадаплаўную і балотную дзічыну, слонка, вяхіра, шызага голуба, перапёлкі, фазана, а таксама на ваўка, лісіцу, шакала, янотападобнага сабаку, шэрую варону, сароку, баклана, шэрую чаплю, белую вялікую чаплю.

За апошнія 15 гадоў колькасць лася павялічылася ў 1,8 раза (з 27 да 48 тыс. асобін), высакароднага аленя — у 5,1 раза (з 11 да 57,2 тыс.), казулі — у 1,7 раза (з 73 да 127 тыс. асобін). Такія даныя прыводзяцца ў прааналізаваных “Позіркам” матэрыялах для жнівеньскага “адзінага дня інфармавання насельніцтва”, якія распрацаваныя для інфармацыйна-прапагандысцкіх груп Навукова-даследчым інстытутам тэорыі і практыкі дзяржаўнага кіравання Акадэміі кіравання. Заяўленая тэма — “Экалагічная культура — адказнасць кожнага”.

Паводле афіцыйнай статыстыкі, мядзведзь стаў прамысловым відам, колькасць зубра за апошнія 35 гадоў павялічылася ў 8 разоў (амаль да 3 тыс.асобін), якія сфармавалі 11 мікрапапуляцый, якія жывуць вольна.