Міліцыя і МНС вучацца абараняць прадпрыемствы ад “дэструктыўных сіл”, следчыя — займаць “апорны пункт праціўніка”
26 жніўня, Позірк. У Мінскай вобласці знаходзіцца вялікая колькасць буйных прадпрыемстваў і арганізацый, якія “могуць стаць аб’ектамі ўздзеяння дэструктыўных сіл”, заявіў міністр унутраных спраў Іван Кубракоў на комплексных камандна-штабных вучэннях УУС Мінаблвыканкама 26 жніўня.
Месца правядзення ў рэлізе МУС не пазначана. Пра старт мерапрыемства паведаміла напярэдадні ведамасная газета “На варце”.
Адзначалася, што на ім “мадэляваліся розныя сцэнары развіцця сітуацыі, аналізаваліся аспекты рэагавання, у тым ліку зладжанасць узаемадзеяння на ўсіх узроўнях”. Канкрэтыка не прыводзілася.
Характэрна, што ў абедзвюх публікацыях не ўказваецца поўная назва мерапрыемства. Аднак на відэа і фота МУС адлюстраваны банер, які абвяшчае, што гэта “камандна-штабныя вучэнні па адпрацоўцы элементаў функцыянавання дзяржаўнай сістэмы рэагавання на масавыя беспарадкі на тэрыторыі Мінскай вобласці”.
“Мы адпрацоўваем не толькі спыненне масавых беспарадкаў, але і любыя дзеянні ўсяго сілавога блока пры НС, рэзанансных злачынствах і тэрарыстычных пагрозах”, — сказаў міністр.
Таксама ён “закрануў тэму фізічнай падрыхтоўкі, адзначыўшы, што ўжо ў бліжэйшы час свае навыкі прадэманструюць кіраўніцтва МУС, сталічнага ГУУС, абласных УУС, у тым ліку ўсе генералы”.
На вучэннях “прапрацавана пытанне прыцягнення спецтэхнікі МНС пры дзеяннях у асаблівых умовах”.
Прэс-служба Следчага камітэта 26 жніўня паведамляе аб вучэбна-метадычным зборы супрацоўнікаў сталічнага УСК з байцамі САХР унутраных войскаў МУС у навучальным цэнтры спецназа “Валоўшчына” (Мінскі раён).
Адпрацоўваліся “дзеянні ў розных умовах, набліжаных да рэальных баявых”: “Трэніроўка ўключала адбіццё нападу суперніка, занятак яго апорнага пункта, абясшкоджванне злачынцаў з наступным правядзеннем следчых дзеянняў”.
Міліцыя Мінскай вобласці вучыцца спыняць “масавыя беспарадкі” ўжо другі раз у гэтым месяцы. Аб правядзенні “тактычнай трэніроўкі па адпрацоўцы навыкаў падтрымання правапарадку” паведамляла прэс-служба УУС Мінаблвыканкама 11 жніўня.
У чэрвені трэніроўкі міліцыі “з выбухамі і стрэламі” прайшлі ў Рэчыцы (Гомельская вобласць), Віцебску (на ўзроўні МУС) і Баранавічах (Брэсцкая вобласць), у ліпені — у Гродне і вобласці, 18 жніўня — у Віцебскай вобласці.
Сілавікі праводзяць падобныя трэніроўкі, каб не дапусціць “паўтарэння падзей 2020 года”, заявіў Кубракоў у маі падчас комплексных камандна-штабных вучэнняў у Магілёве.
30 ліпеня падчас трэніровак у Гродзенскай вобласці кіраўнік МУС заявіў, што “масавыя беспарадкі” могуць узнікнуць “на роўным месцы”: “Канфлікт паміж двума грамадзянамі або паміж дзецьмі можа перарасці ў [іх]”.
Масавыя палітычныя рэпрэсіі, якія рэжым Аляксандра Лукашэнкі разгарнуў пасля брутальнага падаўлення пратэстаў, выкліканых фальсіфікацыяй выбараў 2020 года і жорсткасцю сілавікоў, не спыняюцца да гэтага часу.
У выніку дзеянняў супрацоўнікаў сілавых органаў загінулі ўдзельнікі пратэстаў Аляксандр Тарайкоўскі, Генадзь Шутаў (абодва застрэлены), Раман Бандарэнка, Аляксандр Віхор і інш. Адказнасць за гэта ніхто не панёс.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.
На гэтым фоне вучэнні сілавікоў, у тым ліку вайскоўцы, кіруючы рэжым праводзіць практычна няспынна.
Мінабароны аб'явіла аб пачатку другіх вучэнняў і трэцяга мерапрыемства за дзень
25 жніўня, Позірк. Прыкрыццё ахоўных аб'ектаў і войскаў ад удараў сродкаў паветранага нападзення і манеўры падраздзяленняў зенітных ракетных воінскіх часцей будзе адпрацавана на першым этапе вучэнняў злучэнняў і воінскіх часцей ВПС і войскаў СПА, паведамляе Міністэрства абароны. Аператыўна-тактычныя вучэнні праходзяць …
