Праверка “баявой і мабілізацыйнай гатоўнасці” МНС праходзіць у Віцебску

8 верасня, Позірк. Пра правядзенне “баявой і мабілізацыйнай гатоўнасці падраздзяленняў Віцебскага гарнізона” Міністэрства па надзвычайных сітуацыях паведаміла прэс-служба ведамства.

Як адзначаецца, міністр Вадзім Сіняўскі прыняў рашэнне ў дачыненні да падраздзяленняў Віцебскага абласнога ўпраўлення МНС “пра перавод іх дзейнасці на асаблівы перыяд”.

У манеўрах будуць задзейнічаныя падраздзяленні Наваполацкага, Полацкага і Аршанскага аддзелаў МНС.

Ведамства сістэматычна праводзіць тактыка-спецыяльныя вучэнні на розных аб’ектах у сталіцы: у метро, на тэрыторыі прадпрыемства “БелОМА”, у РНПЦ дзіцячай хірургіі, гарадскім цэнтры алімпійскага рэзерву па тэнісе, Цэнтры тэхнічнай творчасці дзяцей і моладзі, канцэртнай зале “Мінск”.

Манеўры таксама праводзіліся ў гандлёвым цэнтры “Мандарын Плаза” ў Гомелі.

28 ліпеня Сіняўскі на аператыўнай нарадзе сталічнага ўпраўлення МНС заявіў, што ў інтэрнатах Мінска будуць на сталай аснове праводзіць трэніровачныя эвакуацыі на выпадак пажараў.

Пра баявыя вучэнні МНС раней не паведамляла.

2 верасня пачалася праверка баягатоўнасці ва ўнутраных войсках МУС.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.

На гэтым фоне вучэнні сілавікоў, у тым ліку ваенныя, кіроўны рэжым праводзіць практычна безупынна.