Беларускія вайскоўцы правядуць на вучэннях у РФ баявыя стрэльбы з ЗРК

9 верасня, Позірк. Пра ўдзел беларускіх вайскоўцаў у аператыўна-тактычных вучэннях з родамі ВПС і войскаў СПА на адным з палігонаў у Расіі паведаміла 9 верасня Міністэрства абароны.

Адзначаецца, што на вучэннях вайскоўцы радыётэхнічнай брыгады вядуць “бесперапынную радыёлакацыйную выведку”.

“Разгорнутыя радыёлакацыйныя станцыі здольныя за лічаныя секунды выявіць, распазнаць і суправадзіць цэль”, — гаворыцца ў паведамленні.

У бліжэйшыя дні на палігоне пройдуць баявыя стрэльбы зенітных ракетных комплексаў (ЗРК).

“Свае задачы зенітныя ракетныя падраздзяленні могуць рэалізаваць толькі ў цесным узаемадзеянні з падраздзяленнямі радыётэхнічных войскаў. Гэта свайго роду “вочы” і “вушы” зенітных ракетных падраздзяленняў, з якімі мы сумесна выконваем задачы па супрацьпаветранай абароне”, — цытуе Мінабароны неназванага камандзіра радыётэхнічнай брыгады.

Камандзір паведаміў, што падраздзяленні вядуць радыёлакацыйную выведку паветранай прасторы, пасля чаго выдаюць выведвальную інфармацыю воінскім часцям зенітных ракетных войскаў і авіяцыі.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.

На гэтым фоне вучэнні сілавікоў, у тым ліку вайскоўцаў, кіруючы рэжым праводзіць практычна безупынна.