Рэтранслятары для навядзення расійскіх БПЛА аднавілі працу на поўдні Беларусі — кіраўнік ГУВ Украіны
11 верасня, Позірк. Аб аднаўленні працы на тэрыторыі Беларусі рэтранслятараў, якія выкарыстоўваюцца расійскімі вайскоўцамі для навядзення беспілотнікаў, заявіў у інтэрв’ю брытанскай газеце The Times начальнік Галоўнага ўпраўлення выведкі (ГУВ) Мінабароны Украіны Алег Івашчанка.
Паводле яго слоў, вайскоўцы РФ могуць выкарыстоўваць “разгалінаваную сетку з вялікай колькасцю вышак і рэтранслятараў”.
Кіраўнік ГУВ паведаміў, што ўкраінская выведка выявіла шэсць такіх рэтранслятараў на поўдні Беларусі ўздоўж мяжы з Украінай. Паводле яго сцвярджэння, гэтыя аб’екты дазваляюць расіянам перадаваць відэаструмені на вялікія адлегласці.
“На працягу некаторага часу яны перасталі ўсталёўваць іх, але цяпер мы бачым, што некаторыя рэтранслятары зноў працуюць. У нас дастаткова магчымасцяў, каб з гэтым разабрацца“, — сказаў Івашчанка.
19 чэрвеня прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення расійскіх дронаў уздоўж мяжы з Украінай: “Калі ён гэта не зробіць, зробім мы“. Зяленскі таксама заклікаў спыніць пастаўку нафтапрадуктаў расійскай арміі.
На наступны дзень у звароце да суайчыннікаў ён заявіў, што Украіне вядома “аб чатырох такіх рэтранслятарах у Беларусі — у Гомельскай і Брэсцкай абласцях“, і паўтарыў, што ў Беларусі “ёсць час, каб дэмантаваць гэтае абсталяванне“.
24 чэрвеня Зяленскі паведаміў, што абсталяванне спыніла працу двума днямі раней: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі ўважліва сачу і штодзённыя даклады атрымліваю. Факт, што рэтранслятары на сёння не працуюць”.
Днём пазней кіраўнік украінскай дзяржавы запатрабаваў спыніць развіццё памежнай інфраструктуры агрэсіі з боку Мінска.
Галоўнакамандуючы Узброенымі сіламі Украіны Аляксандр Сырскі 30 чэрвеня паведаміў, што беларускі бок не дэмантаваў рэтранслятары, якія дапамагаюць наводзіць расійскія дроны на ўкраінскую тэрыторыю, аднак яны былі выключаныя на некаторы час.
1 ліпеня спікер Дзяржаўнай памежнай службы Украіны Андрэй Дземчанка заявіў, што размешчаныя на беларускай тэрыторыі рэтранслятары, якія РФ выкарыстоўвае для таго, каб біць па Украіне “Шахедамі“, выключаныя. У той жа час, адзначыў ён, “у Беларусі працягваюць развіваць аб’екты ваеннай інфраструктуры, якія могуць быць прадастаўлены ў карыстанне Расійскай Федэрацыі падчас разгортвання ваенных дзеянняў“.
15 ліпеня дарадца Міністэрства абароны Украіны Сяргей Бяскрэстнаў адзначыў, што, магчыма, рэтранслятары ў Беларусі час ад часу працягваюць выкарыстоўвацца“ для нападаў на краіну.
7 верасня Івашчанка ў інтэрв’ю “Укрінформ“ заявіў, што Украіну “турбуе наданне Беларуссю дазволу на размяшчэнне на сваёй тэрыторыі рэтранслятараў радыёсігналаў, якія наводзяць расійскія ўдарныя БПЛА тыпу “Шахед“ на ўкраінскія грамадзянскія аб’екты і крытычную інфраструктуру“.
