Лукашэнка пацвердзіў прыезд Коўла, сцвярджае, што ўжо грузяцца беларускія калійныя ўгнаенні ў ЗША і рыхтуецца праграма па ядзерных матэрыялах (дапоўнена)

11 верасня, Позірк. Хуткі прыезд у Мінск спецпасланніка прэзідэнта ЗША Джона Коўла пацвердзіў Аляксандр Лукашэнка, размаўляючы з дзяржСМІ на агульнавайсковым палігоне Абуз-Лясноўскі (Баранавіцкі раён, Брэсцкая вобласць).

“Я казаў адкрыта, што я трампіст, я падтрымліваў [Дональда] Трампа. Я бачу яго памылкі. Пра гэта кажу прама яго лепшаму сябру, які павінен прыехаць да нас“, — сказаў Лукашэнка.

Прамоўца зноў агучыў жаданне сустрэцца з прэзідэнтам ЗША, гатоўнасць “і да малой, і да вялікай угоды“.

Лукашэнка “нагадаў, што першапачаткова ў кантактах з ЗША ўсё зацыклілася на, як іх называюць, палітвязнях” (фармулёўка агенцтва БелТА), і “ў гэтым пытанні Беларусь таксама пайшла насустрач”.

Да гасподзь з вамі, бярыце. Вось усе перажывалі: “Ах, Ціханоўскага адпусцілі!” І дзе Сярожа? Знайсці не могуць. Ён нікому не патрэбен“, — у традыцыйна грэблівай манеры выказаўся ён пра экс-палітвязня, які знаходзіцца ў ЗША.

“Мы адкрытыя. Яны паздымалі санкцыі з шэрагу нашых прадпрыемстваў, гатовыя і далей здымаць. Там куча пытанняў, — адзначыў Лукашэнка. — Амбасада — давайце абмяркоўваць, як будзем аднаўляць [працу]. Ядзерныя матэрыялы і іншае — там цэлая праграма ў нас — калі ласка. Хочаце ў нас калійныя ўгнаенні (калі хочаце) закупляць — калі ласка“.

Адначасова Лукашэнка заявіў аб нібыта пастаўцы беларускіх калійных угнаенняў Вашынгтону: “Цяпер грузім калій — прадаем Злучаным Штатам Амерыкі. <…> Вось у нас вызвалілася. Мы ж закантрактавалі іх (ўгнаенні. — “Позірк”.) на гэты год, на наступны год разгледзім. Цяпер з’явілася магчымасць судна загрузіць (заўтра дакладна скончым загрузку) — забірайце“.

“Але даўжок вярніце. 43–44 млн долараў нашых у “Сіцібанку” затрымаліся — кампанія, якая з намі супрацоўнічала, заплаціла грошы. У багатай Амерыцы затрымаліся. Вы нам, калі ласка, вярніце гэтыя грошы. Урад мне далажыў пісьмова. Грошы вярніце! Гэта ж ганьба для ЗША. Потым мы з вамі будзем дамаўляцца пра больш сур’ёзныя рэчы“, — сказаў ён, не патлумачыўшы, што мае на ўвазе.

Раней паведамлялася, што, паводле неафіцыйнай інфармацыі, Коўл можа зноў прыехаць у Беларусь 14 верасня. 29 жніўня ён заяўляў, што праз пару тыдняў паедзе ў Мінск, дзе плануе вызваліць яшчэ 200–300 палітвязняў.

Апошні раз Коўл быў у беларускай сталіцы ў сакавіку. Вынікам стала вызваленне 250 палітвязняў, з якіх толькі 15 было выслана за мяжу, як гэта было да гэтага практычна з усімі астатнімі. Узамен ЗША адмянілі некаторыя санкцыі ў дачыненні да Мінска, у тым ліку па калійных угнаеннях.

Прадстаўнікі дэмсілаў выступаюць за магчымасць вызваленым заставацца ў Беларусі.

Дапаўненне.

Паводле слоў Лукашэнкі, візіт Джона Коўла ў Беларусь запланаваны на 15 верасня.