Пачобут вярнуўся ў Польшчу, у найбліжэйшы час накіруецца ў ЗША і Канаду

15 верасня, Позірк. Былы палітвязень, журналіст і актывіст неафіцыйнага Саюза палякаў Беларусі Анджэй Пачобут раніцай 15 верасня перасёк беларуска-польскую мяжу ў пункце пропуску Кузніца Беластоцкая (з беларускага боку — Брузгі), паведамляе “Газета Выборча”.

Паводле інфармацыі выдання, падчас знаходжання Пачобута ў Беларусі правакацый з боку сілавікоў не было, але яго прысутнасць, верагодна, пільна адсочвалася.

Паведамляецца, што ў найбліжэйшы час Пачобут мае намер наведаць ЗША і Канаду. Там ён сустрэнецца з палітыкамі і прадстаўнікамі польскай дыяспары.

Журналіст, як адзначана, таксама працуе над кнігай пра перажытае ў зняволенні, якую плануе выдаць польскае выдавецтва Agora.

8 верасня Пачобут часова вярнуўся з Польшчы ў Беларусь.

На наступны дзень экс-палітвязень напісаў на сваёй старонцы ў “Фэйсбуку”, што пабываў у гродзенскім офісе Саюза палякаў у Беларусі.

14 верасня ён паведаміў пра запланаванае адкрыццё ў Ваўкавыску (Гродзенская вобласць) новага пункта навучання ад СПБ.

“Газета Выборча” паведаміла, што ў Беларусі Пачобут “сустракаўся з прадстаўнікамі польскай меншасці, зноў наведаў памятныя месцы, звязаныя з польскай гісторыяй”. “Пабываў у Гродне, адкуль родам, і наваколлі, у Мінску, Ваўкавыску і Кобрыне. У Гродне ён наведаў, у прыватнасці, помнік Элізе Ажэшцы. Таксама Пачобут сустракаўся з іншымі былымі палітвязнямі і сваякамі, у тым ліку з бацькам”, — гаворыцца ў матэрыяле.

53-гадовы актывіст быў выпушчаны на свабоду і вывезены з Беларусі ў Польшчу 28 красавіка. Ён быў у ліку асуджаных, якіх дэмакратычныя краіны вызвалілі ў рамках абмену з Беларуссю і РФ паводле схемы “пяць на пяць”.

Пазней Пачобут паведаміў, што афіцыйна быў памілаваны, хоць не пісаў прашэння пра гэта.

1 верасня намеснік кіраўніка Міністэрства ўнутраных спраў і адміністрацыі Польшчы Чэслаў Мрочэк выказаў асцярогу, што вяртанне Пачобута ў Беларусь “нясе велізарную рызыку для яго”.

Галоўная рада СПБ упаўнаважыла старшыню арганізацыі Анжаліку Борыс “рабіць крокі ў кірунку легалізацыі дзейнасці”, паведаміла яна 7 верасня ў эфіры польскага тэлеканала TVP Wilno.

Паводле інфармацыі Centrum Europy TVP ад ананімных крыніц, рэжым Аляксандра Лукашэнкі перадаў арганізацыі польскай меншасці прапанову, якая мае стаць “жэстам добрай волі ў адрас Варшавы”.

15 верасня Мінск наведвае спецыяльны прадстаўнік прэзідэнта ЗША Джон Коўл. Папярэднія паездкі амерыканскага візіцёра ў Мінск і сустрэчы з Лукашэнкам суправаджаліся вызваленнем палітвязняў, у тым ліку Пачобута.

Саюз палякаў у Беларусі застаецца найбуйнейшай грамадскай арганізацыяй польскай меншасці, якая дзейнічае ва ўмовах непрызнання афіцыйным Мінскам з 2005 года.

У 2024 годзе Камітэт дзяржаўнай бяспекі прызнаў “экстрэмісцкім фарміраваннем” групу асоб, датычных да сайта СПБ znadniemna.pl. Цяпер сайт даступны па адрасе portalzpb.pl.