Закупка ЗША “крывавага калію” ў Беларусі стане падтрымкай агрэсіі РФ, лічыць прэм’ер канадскай правінцыі Саскачэван

22 верасня, Позірк. Закупка Злучанымі Штатамі Амерыкі калійных угнаенняў у Беларусі будзе азначаць падтрымку агрэсіўных дзеянняў Расіі супраць Украіны, такое меркаванне выказаў 21 верасня прэм’ер-міністр канадскай правінцыі Саскачэван Скот Мо.

“Больш за 40 краін — Канада і яе саюзнікі — увялі санкцыі супраць Беларусі за падтрымку ўварвання ваеннага злачынцы [Уладзіміра] Пуціна ва Украіну, — напісаў кіраўнік урада правінцыі на сваёй старонцы ў сацыяльнай сетцы Х. — Купляць “крывавы калій” у Беларусі — значыць падтрымліваць расійскую агрэсію”.

“Гэта няправільна і не мае сэнсу. Увесь гэты калій спачатку давядзецца дастаўляць праз Расію, далей — праз акіян, а пасля праз тэрыторыю ЗША — фермерам Сярэдняга Захаду. Няўжо нехта верыць, што беларускі “крывавы калій”, дастаўлены праз Расію, будзе больш танны, экалагічны ці этычны, чым калій з Саскачэвана — адсюль, з Паўночнай Амерыкі?” — задаўся ён пытаннем адносна эфектыўнасці плана прэзідэнта ЗША Дональда Трампа.

Канадская вяшчальная карпарацыя CBC на фоне агучанага Трампам плана і рэакцыі Мо адзначыла, што амаль траціна сусветнай вытворчасці калію ў 2024 годзе прыпадала на Канаду. Пры гэтым усе 10 дзейных калійных руднікоў краіны месцяцца менавіта ў Саскачэване.

Паводле інфармацыі медыя, у 2025 годзе Канада экспартавала ў ЗША калію на 4,2 млрд долараў. Цяпер гэты від прадукцыі вызвалены ад амерыканскіх тарыфаў.

Прафесар эканомікі размешчанага ў Саскачэване ўніверсітэта Рэджайны Джэйсан Чайлдс заявіў CBC, што беларускі калій можа выявіцца для ЗША даражэйшым за канадскі праз больш складаную лагістыку. “Я настроены скептычна проста таму, што давядзецца пераадольваць значна большую адлегласць”, — сказаў ён.

Выхад Беларусі і РФ на паўночнаамерыканскі рынак, паводле слоў Чайлдса, таксама можа прывесці да зніжэння цэн на калій і паўплываць на канадскіх вытворцаў.

У матэрыяле CBC адзначаецца, што ў 2027 годзе ў Саскачэване плануецца ўвесці ў працу новы калійны руднік Jansen, які будуе аўстралійска-брытанская кампанія BHP.

21 верасня Трамп напісаў на сваёй старонцы ў сацыяльнай сетцы Truth Social, што ЗША “працуюць над буйной здзелкай па закупцы калійных угнаенняў у Беларусі”. “Цана будзе істотна ніжэйшая за тую, якую мы цяпер плацім Канадзе, — гэта вельмі добрая навіна для нашых фермераў і ўладальнікаў ранча. Дзякую за ўвагу да гэтага пытання!” — адзначыў палітык.

Раней у той дзень Лукашэнка на сустрэчы са старшынёй Дзяржаўнага мытнага камітэта Уладзімірам Арлоўскім заявіў, што Мінск не можа паставіць у ЗША вялікіх аб’ёмаў калійных угнаенняў, бо вырабленая прадукцыя ўжо звязаная кантрактамі на гэты год з іншымі краінамі.

11 верасня Лукашэнка паведаміў пра нібыта пастаўку беларускіх калійных угнаенняў Вашынгтону, якая цяпер адбываецца: “Цяпер грузім калій — прадаём Злучаным Штатам Амерыкі. <…> Вось у нас вызвалілася. Мы ж закантрактавалі іх (угнаенні. — “Позірк”.) на гэты год, на наступны год разгледзім. Цяпер з’явілася магчымасць судна загрузіць (заўтра дакладна скончым загрузку) — забірайце”.

15 верасня ён прыняў у Мінску спецпрадстаўніка прэзідэнта ЗША па Беларусі Джона Коўла. У афіцыйных рэлізах тэма не ўздымалася.

Аднак у апублікаваным на наступны дзень інтэрв’ю The New York Times ад 16 верасня Коўл заявіў: “Здзелка па калійных угнаеннях знаходзіцца ў вельмі добрым стане, каб забяспечыць іх пастаўкі з Беларусі ў ЗША — менавіта гэтага хоча прэзідэнт Трамп. Сёння я сустрэўся з прэзідэнтам Літвы, а заўтра сустрэнуся з прэзідэнтам Латвіі, каб дамагчыся ўзгодненай пазіцыі ўсіх бакоў”.

16–17 верасня прадстаўнік Штатаў сустрэўся з прэм’ер-міністрамі Літвы і Латвіі, а таксама літоўскім прэзідэнтам. У афіцыйных паведамленнях тэма транзіту калію не фігуравала.

Сёлета ў сакавіку па выніках візіту Коўла ЗША скасавалі санкцыі ў дачыненні да беларускіх калійных угнаенняў. Пры гэтым іх пастаўка праз порт Клайпеды (Літва) немагчымая ў сувязі з санкцыямі Еўрапейскага саюза.