Умовай для дыялогу з Мінскам у МЗС Польшчы назвалі спыненне агрэсіўных дзеянняў

24 верасня, Позірк. Умовай для змястоўнага дыялогу Польшчы і Беларусі з’яўляецца поўнае спыненне агрэсіўных дзеянняў з боку апошняй. Пра гэта заявіў у інтэрв’ю ўкраінамоўнаму польскаму Slawa TV намеснік міністра замежных спраў краіны Марцін Басацкі.

Паводле яго, “ужо на працягу некалькіх месяцаў бачна, як у жэстах і дзеяннях Беларусі ў дачыненні да Польшчы і іншых суседніх краін зніжаецца агрэсіўнасць“: “Сярод такіх жэстаў — вызваленне палітвязняў, агульнай колькасцю каля 800 чалавек па стане на 23 верасня. Канешне, па-ранейшаму некалькі сотняў палітвязняў знаходзіцца ў турмах [Аляксандра] Лукашэнкі. Мы пра гэта не забываемся“.

“І таксама адбылося вельмі значнае зніжэнне гібрыднага ціску на Польшчу і Еўропу на беларуска-польскай мяжы. Тут сёлета адбыўся сапраўдны пералом*“, — заявіў Басацкі.

Нагадаўшы, што “міграцыйны ціск на ўсходнюю мяжу Польшчы і іншых краін ЕС быў штучна ініцыяваны беларускімі спецслужбамі“, дыпламат адзначыў, што атакі мігрантаў калі і не спыніліся поўнасцю, то знаходзяцца “на ўзроўні некалькіх працэнтаў ад узроўню папярэдніх чатырох-пяці гадоў“.

“Эфект гэтага — пачатак дыялогу, сімвал якога мы бачым сёння ў Нью-Йорку“, — адзначыў ён.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай“, арганізаванай рэжымамі ў Мінску і Маскве.

Як адзначаў “Позірк“, Памежная ахова Польшчы апошнія восем дзён (з 16 верасня) не фіксуе актыўнасці нелегальных мігрантаў на мяжы з Беларуссю.

Спакойнае абстаноўка назіраецца на фоне публічных кантактаў Мінска і Варшавы.

Кіраўнік МЗС Польшчы Радаслаў Сікорскі сустрэўся з міністрам замежных спраў Беларусі Максімам Рыжанковым 22 верасня ў Нью-Ёрку на палях Генеральнай Асамблеі ААН. Польскі міністр назваў яе “азнаямленчай“ і параўнаў перспектывы нармалізацыі двухбаковых стасункаў з Мінскам з “падснежнікам, які можа заквітнець пры спрыяльных умовах”.

“Сустрэча з міністрам замежных спраў Рэспублікі Польшча Радаславам Сікорскім была прысвечана аналізу стану беларуска-польскіх адносін на бягучым этапе і шляхоў іх далейшага развіцця ў інтарэсах народаў дзвюх краін. Бакі таксама абмеркавалі сітуацыю ў рэгіёне“, — паведаміў МЗС Беларусі.

Паводле неафіцыйнай інфармацыі, кантакт быў запытаны Мінскам.

Адносіны Беларусі і Польшчы, якія значна пагоршыліся ў сувязі з прыгаворам актывісту неафіцыйнага Саюза палякаў Беларусі Анджэю Пачобуту і міграцыйным крызісам на мяжы, апошнім часам дэманструюць тэндэнцыю да пацяплення.

Яго прыкметамі сталі вызваленне Пачобута ў красавіку і яго нядаўняя паездка ў Беларусь (актывіст дэкларуе намер жыць у краіне. — “Позірк“.), адкрыццё Польшчай раней закрытых пунктаў пропуску на мяжы, а таксама значнае зніжэнне міграцыйнага ціску з боку Мінска: цяпер найбольшая колькасць нелегалаў назіраецца на мяжы з Латвіяй.

У той жа час у Варшаву нядаўна пераехала з Вільнюса беларускі дэмакратычны лідар Святлана Ціханоўская, пасля падзеяў 2020 года ў краіне знайшлі прытулак многія беларусы.

* Варта адзначыць, што словы Басацкага верныя толькі часткова: ад пачатку верасня, як вынікае з праведзенага “Позіркам“ аналізу, краіна зарэгістравала 85 спроб незаконнага пранікнення з боку Беларусі, што на 57,4% больш, чым за ўвесь жнівень (54 спробы).

Тым не менш, за выключэннем студзеня і лютага, у 2026 годзе актыўнасць мігрантаў на польскай мяжы меншая, чым на літоўскай і латвійскай: 474 спробы нелегальнага пераходу супраць 1.578 на беларуска-літоўскай мяжы (розніца ў 3,3 разу) і 11.359 — на беларуска-латвійскай (у 24 разы большая).

Польшча ў 2022 годзе прадухіліла 15.699 спроб нелегальнага пераходу ўсходняй мяжы, у 2023-м — 25.571, 2024-м — 29.972, 2025 — 29.055.