Беларуская дыяспара ў Грузіі прапануе мясцоваму МУС абмеркаваць набалелыя пытанні ў сувязі з высылкай Льва Міхеева

27 верасня, Позірк. Беларускія палітэмігранты, якія пражываюць у Грузіі, прапанавалі Міністэрству ўнутраных спраў краіны правесці сустрэчу для абмеркавання набалелых пытанняў. Падставай сталі высылка актывіста дыяспары Льва Міхеева, які пяць гадоў беспаспяхова дамагаўся прытулку, і рэакцыя МУС на рэзананс у СМІ, паведаміла “Позірку“ Марына Калініна (Зялёная).

Двухразовая чэмпіёнка свету па тайскім боксе Калініна разам з малалетнім дзіцем таксама жыве ў Грузіі і спрабуе атрымаць міжнародную абарону. Яна член Каардынацыйнай рады (фракцыя “Ваш голас”), уваходзіць у склад міжнароднай камісіі КР.

Паводле слоў Калінінай, падрабязны прэс-рэліз МУС па кейсе Міхеева — першая такая рэакцыя мясцовых уладаў на высылку або адмову ва ўездзе беларусам, якія абнулялі тэрмін знаходжання ў краіне (дазволена не больш за 365 дзён запар). “Гэта можа сведчыць пра гатоўнасць да дыялогу. Са свайго боку мы гатовыя таксама”, — сказала актывістка.

Яна прапанавала МУС і Дэпартаменту міграцыі, які ўваходзіць у яго структуру, абмеркаваць сем пытанняў. Сярод іх — “выдача дакументаў, якія пацвярджаюць асобу (або падаўжэнне пашпарта з тэрмінам, які скончыўся) для беларусаў Грузіі“; “амністыя для людзей з беларускім пашпартам, які скончыўся, і магчымасць легалізацыі (на гэты момант — турма, дэпартацыя, штраф, забарона на ўезд у Грузію)“; “абмеркаванне кейсаў беларусаў, якія падалі пазовы ў міжнародны (еўрапейскі. — “Позірк“.) суд па правах чалавека, легалізаваць знаходжанне тых, хто падаў пазовы ў Грузіі (цяпер гэтыя людзі пазбаўленыя дакументаў, магчымасці працаваць і зарабляць сабе на пражытак, карыстацца банкаўскімі паслугамі і г.д.)“; “паменшыць бюракратычную нагрузку на беларусаў Грузіі па легалізацыі і даць магчымасць атрымання неабходных дакументаў і дазволаў людзям з сацыяльна неабароненых груп“.

Паралельна на фэйсбук-старонцы беларускай дыяспары ў Грузіі на трох мовах — англійскай, грузінскай і беларускай — як рэакцыя на паведамленне МУС апублікаваныя пытанні ведамству. Аўтары, у прыватнасці, цікавяцца, ці гатовае яно ўступіць у дыялог па справе Міхеева і ініцыяваць яго дадатковы публічны разгляд. Акрамя таго, беларусы просяць адказаць, чаму “ў гасціннай Грузіі” ніхто з суайчыннікаў за ўсе гэтыя гады не атрымаў міжнародную абарону.

Раней па тэме:

МУС Грузіі: Міхееў не меў падстаў для міжнароднай абароны, з 29 чэрвеня быў нелегалам

Леў Міхееў: У Арменіі разумеюць палітычны характар пераследу, у Грузіі — бяспраўе і прыніжэнне

Паліцыя Арменіі адпусціла Льва Міхеева на волю

Затрыманага беларуса Льва Міхеева грузінскія ўлады выслалі ў Арменію, дзе ён таксама затрыманы

У Грузіі затрыманы беларус, які пяць гадоў чакае палітычнага прытулку