Дзяржсакратар ЗША адзначыў гатоўнасць Рыгі да ўзаемадзеяння з Мінскам па пытанні нелегальнай міграцыі

7 кастрычніка, Позірк. Сур’ёзным выклікам бяспекі прызнаў нелегальную міграцыю на мяжы з Беларуссю дзяржаўны сакратар ЗША Марка Рубіё ў афіцыйным лісце міністру замежных спраў Латвіі Байбе Бражэ.

Фота карэспандэнцыі яна апублікавала ў сацсетцы Х.

З ліста вынікае, што Бражэ звярталася да ўладаў у Вашынгтоне, выказваючы занепакоенасць сітуацыяй на латвійска-беларускай мяжы.

“Злучаныя Штаты высока цэняць вашу прыхільнасць да справы кантролю над сваімі нацыянальнымі межамі і вашу гатоўнасць узаемадзейнічаць па гэтым пытанні з беларускімі ўладамі, — заявіў Рубіа. — Дзякую вам за ўзаемадзеянне з маёй камандай, якая адказвае за справы [з Беларуссю], і са спецыяльным пасланнікам прэзідэнта Джонам Коўлам”.

Латвія, паводле яго слоў, з’яўляецца надзейным саюзнікам ЗША па НАТО. Вашынгтон шануе ўклад Рыгі ў “дасягненне агульных мэт бяспекі ў рэгіёне”.

Афіцыйныя асобы Латвіі не заяўлялі аб гатоўнасці да кантактаў з беларускімі ўладамі.

Публікацыя ліста Рубіё адбылася на фоне эскалацыі на мяжы.

6 кастрычніка міністр унутраных спраў Латвіі Яніс Дамбрава заявіў у X аб “асабліва дэманстратыўнай і агрэсіўнай” правакацыі на мяжы з Беларуссю.

Паводле яго, на гэтым тыдні латвійскія ваенныя спынілі спробу 20 мігрантаў незаконна перайсці мяжу з боку Беларусі. Мігрантаў “актыўна гналі да мяжы” ўзброеныя людзі ў масках. Яны, паводле слоў міністра, пагражалі латвійскім ваеннаслужачым.

“Праз некалькі гадзін пасля гэтага канфлікту людзі ў масках праніклі на тэрыторыю Латвіі, пашкодзілі камутатар і скралі камеры. Перш чым паспелі прыбыць пагранічнікі, людзі вярнуліся на тэрыторыю Беларусі”, — адзначыў Дамбрава.

Мінск, дадаў ён, “павінен разумець, што такія выпадкі могуць прывесці да больш цяжкіх наступстваў для самой Беларусі”.

Афіцыйнага абвяржэння гэтай інфармацыі ад беларускіх уладаў не было, аднак у дзяржСМІ яна ахарактарызавана як “фэйк”.

Як паказаў праведзены “Позіркам” аналіз даных пагранічных ведамстваў еўрапейскіх дзяржаў, з пачатку года суседнія краіны ЕС спынілі 14,1 тыс. спроб мігрантаў нелегальна перасекчы мяжу з боку Беларусі. Больш за ўсё спроб зафіксавана на латвійскім участку мяжы — 11,9 тыс.; на літоўскай — 1,7 тыс., польскай — каля паўтысячы.

11 жніўня Латвія пачала на мяжы спецаперацыю Vilkatis (“Пярэварацень”). Мэтай было названа “істотнае скарачэнне колькасці незаконных перасячэнняў мяжы і недапушчэнне іх у далейшым”. Спачатку аперацыю планавалася завяршыць 1 верасня, аднак тэрмін заканчэння быў перанесены на 1 кастрычніка. 6 кастрычніка ўрад Латвіі працягнуў аперацыю да 31 снежня.

Міграцыйны крызіс на граніцы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.