Лукашэнка паабяцаў набліжанаму бізнесмену Вераб’ю фінансавую дапамогу і землі для развіцця аграбізнесу

15 кастрычніка, Позірк. Землі для вытворчасці кармоў і фінансавую падтрымку паабяцаў Аляксандр Лукашэнка бізнесмену Мікалаю Вераб’ю, які знаходзіцца пад санкцыямі, падчас рабочай паездкі ў Верхнядзвінскі раён (Віцебская вобласць) і наведвання жывёлагадоўчага прадпрыемства “Чырвоны Бор Агра”, якое належыць прадпрымальніку.

Лукашэнка, як паведамляе яго прэс-служба, запатрабаваў “стратэгічна вызначыць”, як развіваць тэрыторыі поўначы вобласці, і заявіў, што без “найжорсткай дысцыпліны загіне гэты край”.

Ён таксама “ўважліва вывучыў мапу раёна і вызначыў тыя землі, якія можна прапанаваць эфектыўнаму прыватніку для развіцця вытворчасці”.

Перадачу актываў прыватнаму бізнесу Лукашэнка назваў “крайнім варыянтам, але ў гэтым выпадку гэты крок апраўданы”.

“Мікалай, калі ты хочаш падтрымкі, я вось дома адзначыў, што ты павінен узяць. Я гатовы табе гэта перадаць. Тут трэба кардынальна нешта зрабіць. Гэтаму комплексу патрэбныя кармы. Гэтыя землі, якія ёсць, павінны забяспечыць цябе кармамі. Прапануй да вясны мне план”, — сказаў Лукашэнка, паказваючы Вераб’ю мапу.

Візіцёр таксама паабяцаў падтрымку гэтаму аграбізнесу нароўні з агульнымі падыходамі. “Вялікіх грошай няма. Будзем датаваць вас, як усіх”, — сказаў ён.

Мікалай Верабей — буйны беларускі бізнесмен наваполацкага паходжання, якога ў СМІ і міжнародных расследаваннях называюць адным з галоўных “гаманцоў” Аляксандра Лукашэнкі. Яго бізнес-імперыя будавалася на гандлі нафтапрадуктамі, вуглі, транзіце і банкаўскай сферы. Пасля падзей 2020 года ў Беларусі ён стаў фігурантам міжнародных санкцый.

У 2023 годзе Верабей праз Еўрапейскі суд у Люксембургу спрабаваў аспрэчыць уведзеныя супраць яго санкцыі, але суд яму ў гэтым адмовіў.

У рашэнні суда адзначалася, што Верабей — “адзін з вядучых бізнесменаў, якія працуюць у Беларусі, з бізнес-інтарэсамі ў нафтавай, транзітнай, вугальнай, банкаўскай і іншых галінах”, з’яўляецца саўладальнікам “Брэміна-Груп” — “кампаніі, якая карысталася падатковымі льготамі і іншымі формамі падтрымкі з боку беларускіх уладаў”.

Такім чынам, на думку суда, Верабей “атрымлівае выгаду і падтрымлівае [рэжым Лукашэнкі]”. Суд таксама адзначыў, што Верабей належыць “да блізкага кола бізнесменаў, звязаных з Лукашэнкам, і падтрымлівае цесныя сувязі з ім і яго сям’ёй”.

У 2025 годзе Беларускі расследавальніцкі цэнтр (БРЦ) паведамляў, што звязаная, у тым ліку, з Вераб’ём кампанія пастаўляла ў Расію забаронены растваральнік, які выкарыстоўваецца ў хімічнай зброі, на суму больш за 15 млн долараў.

Вераб’я таксама выкрывалі ў абыходзе санкцый і наяўнасці элітнай нерухомасці ў Аўстрыі, нягледзячы на абмежавальныя захады.