Праваабаронцы: 12 красавіка суд разгледзіць справу аб змене ўмоў адбывання пакарання Паўлам Севярынцам і яшчэ шасцю палітвязнямі

25 сакавіка, BPN. Суд па справе аб змене ўмоў адбывання пакарання апазіцыйным палітыкам Паўлам Севярынцам і яшчэ шасцю палітвязнямі адбудзецца 12 красавіка, паведамляе праваабарончы цэнтр “Вясна”.

Справу будзе разглядаць у Наваполацку (Віцебская вобласць) суддзя Ірына Жарава. Акрамя Севярынца яна датычыцца каардынатара грамадзянскай кампаніі “Еўрапейская Беларусь” Яўгена Афнагеля, актывістаў Андрэя Войніча, Паўла Юхневіча, Максіма Вінярскага, відэаблогера Дзмітрыя Казлова (Шэры Кот) і рэдактара тэлеграм-канала “Мая краіна Беларусь” Ірыны Шчаснай.

Праваабаронцы мяркуюць, што гаворка ідзе пра іх перавод на больш жорсткі — турэмны — рэжым утрымання.

25 траўня 2021 года Магілёўскі абласны суд прыгаварыў Севярынца, Афнагеля і Войніча да сямі гадоў, а Юхневіча і Вінярскага — да пяці гадоў калоніі ўзмоцненага рэжыму. Казлоў прыгавораны да пяці гадоў калоніі ўзмоцненага рэжыму, Шчасная — да чатырох гадоў калоніі агульнага рэжыму.

Севярынец, Вінярскі, Юхневіч, Казлоў і Шчасная былі прызнаныя вінаватымі ў арганізацыі масавых беспарадкаў (ч. 2 арт. 293 КК), а Афнагель і Войніч яшчэ і ў навучанні і падрыхтоўцы асоб для ўдзелу ў іх (ч. 3 арт. 293).

Крымінальна-выканаўчы кодэкс кажа, што асуджаныя да пазбаўлення волі ўтрымліваюцца ў турмах “у замкнёных агульных або адзіночных камерах”. У адрозненне ад калоніі ў турмах вязні амаль ніколі не працуюць. Прагулкі асуджаных, якія ўтрымліваюцца ў турме на агульным рэжыме, праводзяцца пакамерна ў дзённы час да паўтары гадзіны.

Ім дазваляецца штомесяц траціць на набыццё прадуктаў харчавання і прадметаў першай неабходнасці не больш за дзве базавыя велічыні (64 рублі), атрымліваць адну пасылку або перадачу і дзве бандэролі на працягу года. Дазваляюцца два кароткатэрміновыя спатканні на працягу года.