Правабаронца заўявіў пра катаванні ў пінскім ІЧУ

4 красавіка, BPN. Правабааронца і актывіст Руху “За Свабоду” Алесь Рамановіч, якога затрымалі ў Пінску за значок з “Пагоняй”, заявіў пра невыносныя умовы ў камеры.

“Мяне затрымалі ў нядзелю, 3 красавіка, пад час традыцыйнай прагулкі у цэнтры Пінска, бо ў мяне на адзенні быў значок з “Пагоняй”. Прыехалі два амапаўцы, сказалі, што праводзіцца праверка, і павезлі ў апорны пункт. Там на мяне склалі пратакол, у якім было куча парушэнняў”, — распавёў BPN Рамановіч.

На яго завялі адміністрацыйную справу і завезлі ў мясцовы ізалятар часовага ўтрымання. Там, як адзначыў Рамановіч, яго змясцілі аднаго ў пяцімесцавую камеру і стварылі практычна невыносныя ўмовы: катавалі немагчымасцю заснуць, холадам, адмаўляліся вадзіць у прыбіральню.

“Размясцілі ў ІЧУ, выдалі цюфячок і бялізну. Толькі пачаў рассцілаць, паступіў загад, і іх у мяне забралі. Пасля 22 гадзінаў павінна былі выдаць, але яны чамусьці “забыліся”. Дзве-тры гадзіны проста сядзеў, знайшоў кніжку Уладзіміра Караткевіча “Дзікае паляванне караля Стаха” і чытаў. Яны пабачылі, што я не кладуся спаць на голыя дошкі, адчынілі, выдалі цюфяк з бялізнай. Толькі заснуў, адчыняецца кармушка, крычаць: “Пад’ём! Назваць сваё прозвішча і артыкул!”. Кажу, артыкула не памятаю, суда яшчэ суда не было”, – распавёў правабаронца.

Паводле яго слоў, за ім увесь час сачылі, і як толькі заўважалі, што ён засынае, працэдура з праверкай паўтаралася — так працягвалася ўсю ноч. Таму праваабаронца ўсю ноч чытаў кнігу, але яе зранку забралі. Акрамя таго, адзначыў Рамановіч, у камеры было вельмі халодна, ніжэй за 10 градусаў цяпла. Каля камеры пастаянна працавала радыё.

“Хацелі мяне запужаць, вывесці з сябе. Стварылі камеру катаванняў, толькі што не прымянялі фізічную сілу”, — сказаў актывіст.

Паводле яго слоў, сёння раніцай адбыўся суд, але справу праз памылкі ў пратаколе даслалі на дапрацоўку.

“Я напісаў шмат заўвагаў. У выніку суддзя не пачынала справу. Толькі зайшлі ў залю суда, і адразу суддзя аб’явіла, што справа адпраўляецца на дапрацоўку. Фактычна суд працягваўся пару хвілінаў”, — адзначыў праваабаронца.

Рамановіч плануе абскарджваць рашэнне суда, якім бы яно ні было. “Справа прынцыповая, бо тычыцца “Пагоні”, — заявіў праваабаронца.