Урад РФ дапусціў беларускія банкі да расійскага рынку дзяржзакупак

14 ліпеня, BPN. Беларускія банкі нароўні з расійскімі змогуць выдаваць незалежныя гарантыі ўдзельнікам расійскай сістэмы дзяржаўных закупак, вынікае з пастановы ўрада РФ № 1238, якую 12 ліпеня падпісаў прэм’ер-міністр Міхаіл Мішусцін.

Прэс-служба расійскага ўрада паведамляе, што дакумент аб “рэалізацыі пілотнага праекта” закліканы “спрасціць доступ да расійскага дзяржзаказу пастаўшчыкоў з Беларусі”. Гэта, як мяркуецца, “будзе садзейнічаць далейшай эканамічнай інтэграцыі дзвюх краін”.

Эксперымент працягнецца да канца 2023 года.

Пасля праходжання ўсіх абавязковых юрыдычных працэдур фінансава-крэдытныя ўстановы з Беларусі змогуць на паўнапраўнай аснове працаваць на рынку расійскіх дзяржзакупак — выдаваць незалежныя гарантыі.

Незалежная гарантыя — адзін са спосабаў фінансавага забеспячэння ў дзяржзакупках. Банк кампенсуе дзяржаўнаму замоўцу гарантыйную суму, калі пастаўшчык не выконвае свае абавязацельствы.

Ва ўрадзе РФ адзначылі, што спрашчэнне доступу беларускіх кампаній да расійскіх дзяржзакупак ёсць часткай “расійска-беларускіх дамоўленасцей, дасягнутых у рамках рашэнняў групы высокага ўзроўню Савета міністраў Саюзнай дзяржавы”.

29 снежня 2021 года прэзідэнт Расіі Уладзімір Пуцін на сустрэчы з Лукашэнкам назваў “добрым крокам з нашага боку допуск беларускіх прадпрыемстваў да дзяржзакупак у Расіі”. На яго думку, гэта “істотным чынам пашырае магчымасці” для беларускіх прадпрыемстваў.