Фігуранты “справы Аўтуховіча” асуджаныя на тэрміны ад 2,5 да 25 гадоў пазбаўлення волі з буйнымі штрафамі

17 кастрычніка, BPN. Гродзенскі абласны суд (суддзя Максім Філатаў) прызнаў вінаватымі 12 фігурантаў “справы Аўтуховіча” паводле шэрагу артыкулаў Крымінальнага кодэкса і прыгаварыў да пазбаўлення волі на тэрміны ад 2,5 да 25 гадоў, паведамляе праваабарончы цэнтр “Вясна”.

Былога прадпрымальніка і грамадскага актывіста Мікалая Аўтуховіча прызналі вінаватым паводле дзесяці артыкулаў КК і прыгаварылі да 25 гадоў пазбаўлення волі з адбываннем пакарання першыя пяць гадоў у турме, 20 гадоў — у калоніі строгага рэжыму са штрафам у памеры 1 тыс. базавых велічынь (на сёння — 32 тыс. рублёў).

Праваслаўны святар Сяргей Разановіч прыгавораны да 16 гадоў пазбаўлення волі ў калоніі ўзмоцненага рэжыму са штрафам 600 базавых велічынь (19,2 тыс. рублёў);

яго жонка Любоў Разановіч — да 15 гадоў пазбаўлення волі ў калоніі агульнага рэжыму з аналагічным штрафам;

іх сын Павел Разановіч — да 19 гадоў пазбаўлення волі ў калоніі ўзмоцненага рэжыму са штрафам 800 БВ (25,6 тыс. рублёў);

Галіна Дзербыш — да 20 гадоў пазбаўлення волі ў калоніі агульнага рэжыму са штрафам 700 БВ (22,4 тыс. рублёў);

Уладзімір Гундар — да 18 гадоў пазбаўлення волі ў калоніі ўзмоцненага рэжыму са штрафам 800 БВ;

Вольга Маёрава — да 20 гадоў пазбаўлення волі ў калоніі агульнага рэжыму з аналагічным штрафам;

Ірына Гарачкіна — да 6 гадоў і 1 месяца пазбаўлення волі ў калоніі агульнага рэжыму са штрафам 300 БВ (9,6 тыс. рублёў);

Віктар Снягур — да 19 гадоў пазбаўлення волі ў калоніі строгага рэжыму са штрафам 800 БВ;

Павал Сова — да 20 гадоў пазбаўлення волі ў калоніі ўзмоцненага рэжыму са штрафам 700 БВ;

Ірына Мельхер — да 17 гадоў пазбаўлення волі ў калоніі агульнага рэжыму са штрафам 700 БВ;

яе сын Антон Мельхер — да 2,5 года пазбаўлення волі (вызвалены ў зале суда, бо адбыў тэрмін пакарання, знаходзячыся пад вартай у СІЗА).

Суд па “справе Аўтуховіча” пачаўся 18 траўня.

11 ліпеня стала вядома, што Аўтуховіч у знак пратэсту супраць абмежаванняў па перапісцы аб’явіў сухую галадоўку, якую спыніў 1 жніўня.

Галадоўку аб’яўляў і Уладзімір Гундар у знак пратэсту супраць таго, што суд не рэагаваў на яго патрабаванні, а таксама ў адказ на прымусовае распрананне перад працэсам.

Праваабаронцы прызналі восем з фігурантаў справы палітвязнямі. Аўтуховіч у іх лік не ўваходзіць.

Беларускі Хельсінкскі камітэт (БХК) звярнуўся да спецыяльных дакладчыкаў ААН па пытанні аб катаваннях, незалежнасці суддзяў і адвакатаў, парушэнні права на здароўе і сітуацыі з правамі чалавека ў кантэксце “справы Аўтуховіча”.

У прыватнасці, праваабаронцы паведамілі, што абвінавачаныя ўтрымліваюцца ў негуманных умовах, да іх прымяняюцца псіхалагічныя і фізічныя катаванні, у прыватнасці, іх пазбаўляюць магчымасці весці перапіску і не прадстаўляюць неабходную медыцынскую дапамогу.

У БХК адзначылі: нягледзячы на тое, што судовы працэс па “справе Аўтуховіча” быў зроблены адкрытым, “фактычна на яго былі дапушчаныя толькі некалькі сваякоў і прадстаўнікі выключна дзяржаўных СМІ”.

Даведка BPN:

ч. 1 арт. 290² — садзейнічанне тэрарыстычнай дзейнасці;

ч. 1 арт. 295³ — незаконныя дзеянні ў адносінах да прадметаў, паражаючае дзеянне якіх заснавана на выкарыстанні гаручых рэчываў;

ч. 3 арт. 361 — заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы;

ч. 2 арт. 357 — змова або іншыя дзеянні, учыненыя з мэтай захопу дзяржаўнай улады;

ч. 3, 4 арт. 295 — незаконныя дзеянні ў адносінах да агнястрэльнай зброі, боепрыпасаў і выбуховых рэчываў;

ч. 1, 2, 3 арт. 285 — стварэнне злачыннай арганізацыі або ўдзел у ёй;

ч. 3 арт. 289 — акт тэрарызму;

ч. 3 арт. 333¹ — незаконнае перамяшчэнне праз мытную мяжу ЕАЭС або дзяржаўную мяжу РБ моцнадзейных, ядавітых, атрутных рэчываў, радыеактыўных матэрыялаў, агнястрэльнай зброі, боепрыпасаў, выбуховых рэчываў, іншых відаў узбраення і ваеннай тэхнікі;

ч. 1 арт. 356 — здрада дзяржаве;

ч. 3 арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;

ч. 1 арт. 342 — арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх.

ч. 1 арт. 405 — укрывальніцтва злачынстваў.