Лукашэнка: Я не магу дапусціць, каб у нас яшчэ раз пайшла хваля ад айцішнікаў ці іпэшнікаў

17 лістапада, BPN. Улады не могуць дапусціць новай хвалі пратэстаў ад прадстаўнікоў ІТ-сферы і прадпрымальнікаў, заявіў Аляксандр Лукашэнка 17 лістапада на дакладзе аб перспектывах развіцця Парка высокіх тэхналогій.

“Вы ж разумееце, што я як чалавек, які адказвае за бяспеку нашай дзяржавы і стабільнасць функцыянавання нашага грамадства, не магу дапусціць, каб у нас яшчэ раз пайшла хваля ад айцішнікаў там, іпэшнікаў і гэтак далей”, — цытуе Лукашэнку яго прэс-служба.

Ён лічыць, што менавіта “дзякуючы прэзідэнту з’явіліся такія галіны ў нашай эканоміцы і ў нашым грамадстве”, таму трэба бачыць і недахопы для таго, каб “своечасова рэагаваць”.

На думку Лукашэнкі, адмаўляцца ад працы ПВТ, не падтрымліваць яго было б няправільна: “У мяне ўжо непакой выклікае, што ў нас, напэўна, празмерны перакос гэтай IT-сферы і падрыхтоўкі спецыялістаў у гэтым плане. Але нічога. Гэта пытанне рэгуляванае. Не будзе попыту — не будзе і падрыхтоўкі. А калі ёсць попыт, значыць, рыхтуюцца людзі. Маладыя людзі хочуць працаваць айцішнікамі”.

У 2020 г. прадстаўнікі ІТ-сферы былі сярод самых актыўных удзельнікаў пратэстаў супраць фальсіфікацыі вынікаў прэзідэнцкіх выбараў. Пасля пачатку рэпрэсій частка кампаній перадыслакавалася за мяжу. Паводле сцвярджэння Лукашэнкі, некаторыя пачалі вяртацца.